ဟန်ဂေရီနိုင်ငံသည် ယူကရိန်းပဋိပက္ခကို ဖြေရှင်းရန်အတွက် ရုရှားနိုင်ငံနှင့် အဆက်အသွယ်ပြုခြင်းကို တားမြစ်ရန် ဥရောပသမဂ္ဂ၏ ကြိုးပမ်းမှုကို ဟန်ဂေရီနိုင်ငံခြားရေးနှင့် ကုန်သွယ်ရေးဝန်ကြီး Peter Szijjarto ကဝေဖန်ခဲ့ပြီး အဆိုပါကြိုးပမ်းမှုကို မိမိနိုင်ငံက ပယ်ချကြောင်းကိုပါ ပြောကြားခဲ့သည်။
“ဒါဟာ လက်ခံနိုင်စရာ မဟုတ်ပါဘူး။ ၂၁ ရာစုမှာ နိုင်ငံတစ်နိုင်ငံဟာ စေ့စပ်ညှိနှိုင်းအဖြေရှာရေးကို လိုလားပြီး အဓိကကျတဲ့ ကိစ္စရပ်တွေအတွက်၊ သူတို့ သဘောမတူတဲ့ သူတွေနဲ့ ဆက်သွယ်ဆောင်ရွက်သင့်ရင် ဆောင်ရွက်ရမှာပါပဲ” ဟု သူက ပြောကြားခဲ့သည်။
ဟန်ဂေရီ ဝန်ကြီးချုပ်သည် ၎င်း၏ ၁၀ ရက်ကြာ ငြိမ်းချမ်းရေး ဖော်ဆောင်ရေး ခရီးစဉ်အတွင်း ဇူလိုင် ၂ ရက်က ကိယက်ဗ်တွင် ဗလာဒီမာ ဇလန်းစကီးနှင့် တွေ့ဆုံဆွေးနွေးခဲ့ပြီး သုံးရက်အကြာတွင် ရုရှားသမ္မတ ဗလာဒီမာပူတင်နှင့်လည်း မော်စကိုတွင် တွေ့ဆုံခဲ့သည်။ ထို့နောက် တရုတ်ခေါင်းဆောင် ရှီကျင့်ဖျင်နှင့် တွေ့ဆုံရန် ဘေဂျင်းမြို့သို့ သွားရောက်ခဲ့ပြီးနောက်၊ ဝါရှင်တန်သို့ သွားရောက်ကာ NATO ထိပ်သီးအစည်းအဝေး ပြင်ပတွင် တူရကီသမ္မတ အာဒိုဂန်နှင့် ဆွေးနွေးခဲ့သည်။ နောက်ပိုင်းတွင် သူသည် ဖလော်ရီဒါသို့ သွားရောက်ခဲ့ပြီး အမေရိကန်သမ္မတဟောင်း ဒေါ်နယ်ထရမ့်နှင့် တွေ့ဆုံကာ ယူကရိန်းအကျပ်အတည်းကို ဖြေရှင်းနည်းများကို ဆွေးနွေးခဲ့သည်။
ဟန်ဂေရီအစိုးရက အဆိုပါခရီးစဉ်အတွင်း ဟန်ဂေရီ ဝန်ကြီးချုပ်သည် ၎င်း၏နိုင်ငံကို ကိုယ်စားပြုကြောင်း ပြောကြားခဲ့ပြီး ဝေဖန်မှုများရှိနေသော်လည်း အဆိုပါ ငြိမ်းချမ်းရေးခရီးစဉ်ကို ဆက်လက်လုပ်ဆောင်သွားမည်ဖြစ်ကြောင်းကိုပါ ပြောကြားခဲ့သည်။
