“ဒေါ်နယ်ထရန့်ကိုအနိုင်ယူဖို့ ဒီမိုကရက်တစ်ပါတီကို စုစည်းပြီး တိုင်းပြည်ကို စည်းလုံးညီညွတ်အောင်လုပ်ဖို့ အစွမ်းရှိသမျှ လုပ်ဆောင်သွားမှာပါ” ဟု ကမလာဟားရစ်ကပြောသည်။
အမေရိကန် ဒုသမ္မတ ကမလာဟားရစ်သည် နိုဝင်ဘာလ ရွေးကောက်ပွဲတွင် အမေရိကန် သမ္မတအတွက် ဒီမိုကရက်တစ် ကိုယ်စားလှယ်လောင်းအဖြစ် အမည်စာရင်း တင်သွင်းရန် ရည်မှန်းထားကြောင်း ကြေညာခဲ့သည်။
အမေရိကန် သမ္မတ ဂျိုးဘိုင်ဒင်၏ ရွေးကောက်ပွဲ ဌာနချုပ်မှ ထုတ်ပြန်သော ကြေညာချက်တွင် အလားအလာရှိသော ဒီမိုကရက်တစ် သမ္မတလောင်းအဖြစ်ရည်မှန်းထားသော ဟားရစ်၏ ဆုံးဖြတ်ချက်ကို ထောက်ခံကြောင်း ကြေညာပြီးနောက် “သမ္မတဘိုင်ဒင်ရဲ့ ထောက်ခံမှုကို ရရှိတဲ့အတွက် ဂုဏ်ယူမိပါတယ်၊ ဒီအဆိုပြုလွှာကို ရယူနိုင်ဖို့ ရည်ရွယ်ထားပါတယ်” ဟု ဟားရစ်ကပြောသည်။
“ဒီမိုကရက်တစ်ပါတီကို ပေါင်းစည်းပြီး ရီပတ်ဘလစ်ကန် ဒေါ်နယ်ထရမ့် နဲ့ သူ့ရဲ့ အစွန်းရောက် Project 2025 အစီအစဉ်ကို အနိုင်ယူဖို့၊ ဒီမိုကရက်တစ်ပါတီကို စုစည်းပြီး နိုင်ငံကို ပေါင်းစည်းဖို့ စွမ်းအားရှိသမျှ လုပ်ဆောင်သွားမှာပါ” ဟု သူမက ကတိပြုခဲ့သည်။ “ရွေးကောက်ပွဲနေ့အထိ ၁၀၇ ရက်ပဲ ကျန်တော့တယ်။ ကျွန်မတို့ အတူတူ တိုက်ပွဲဝင်မယ်။ အတူတူ အနိုင်ယူမယ်။”ဟုလည်း သူမကဆိုသည်။
တနင်္ဂနွေနေ့အစောပိုင်းတွင် ဘိုင်ဒင်သည် သမ္မတအဖြစ် ပြန်လည်အရွေးမခံရရန် ၎င်း၏ဆုံးဖြတ်ချက်ကို ကြေညာခဲ့ပြီး အမေရိကန်သမ္မတလောင်းအတွက် ဒီမိုကရက်တစ်ပါတီ ကိုယ်စားလှယ်လောင်းအဖြစ် ဟာရစ်အား ထောက်ခံခဲ့သည်။
လက်ရှိသမ္မတ ဂျိုးဘိုင်ဒင်သည် ဇွန် ၂၇ ရက်က ရီပတ်ဘလစ်ကန်သမ္မတလောင်း ဒေါ်နယ်ထရန့်နှင့် ရုပ်မြင်သံကြား စကားစစ်ထိုးပွဲအပြီးတွင် လက်ရှိသမ္မတအဖြစ်မှ နုတ်ထွက်ရန် နှင့် ဝင်ရောက်အရွေးမခံရန် အထူးသဖြင့် ဒီမိုကရက်များအကြား တောင်းဆိုမှုများ ပိုမိုပြင်းထန်လာခဲ့သည်။
အမေရိကန်ပြည်ထောင်စုတွင် သမ္မတရွေးကောက်ပွဲကို နိုဝင်ဘာ ၅ ရက်တွင် ကျင်းပမည်ဖြစ်သည်။
