နာမည်ကြီး ဥရောပဘောလုံးကလပ် အသင်းများပါဝင်မည့် U-12 Junior Soccer World Challenge 2024 ပြိုင်ပွဲ မြန်မာ ယူ-၁၂ အသင်းဝင်ရောက်ယှဉ်ပြိုင်သွားမည်ဖြစ်သည်။
အဆိုပါ ပြိုင်ပွဲကို ဂျပန်နိုင်ငံ၊ ချီဘားမြို့တွင် လာမည့် သြဂုတ်လ (၂၀)ရက်မှ (၂၄) ရက်အထိ ကျင်းပပြုလုပ်သွားမည်ဖြစ်ကြောင်း သိရသည်။
လက်ရှိတွင် မြန်မာ ယူ-၁၂ အသင်းအား ကစားသမား (၂၈) ဦးဖြင့် ဖွဲ့စည်းထားပြီး လေ့ကျင့်မှုများ ပြုလုပ်စေခြင်း၊ ခြေစမ်းပွဲများ ယှဉ်ပြိုင်စေခြင်းများ ပြုလုပ်ပြီးနောက် အပြီးသတ် (၁၈)ဦး ရွေးချယ်၍ ပြိုင်ပွဲဝင်ရောက်သွားမည်ဖြစ်သည်။
ပဏာမ မြန်မာယူ – ၁၂ အသင်းသည် ရန်ကုန်နှင့် မန္တလေးဘောလုံး အကယ်ဒမီတို့တွင် ဩဂုတ်လဆန်းပိုင်းအထိ လေ့ကျင့်ပြင်ဆင်မှုများပြုလုပ်သွားမည်ဖြစ်ကြောင်း သိရသည်။
ယခုနှစ် ပြိုင်ပွဲတွင် မြန်မာ ယူ-၁၂ အသင်း အပါအဝင်အသင်း (၄၈)သင်း ဝင်ရောက်ယှဉ်ပြိုင်မည်ဖြစ်ကာ မြန်မာအသင်းသည် အုပ်စု (D)၌ ဂျပန်ကလပ် အသင်းများဖြစ်သည့် Tozuka Football Club Junior၊ Kashima Antlers Norte ၊ FC Basara Hyogo တို့နှင့် ကျရောက်လျက်ရှိကြောင်း သိရသည်။
အဆိုပါ U-12 Junior Soccer World Challenge ပြိုင်ပွဲသည် Osaka Football Association မှ ဦးစီးကျင်းပသော အသက် (၁၂) နှစ်အောက် နိုင်ငံတကာ ဘောလုံးပြိုင်ပွဲ တစ်ခုဖြစ်သည်။
ယင်းပြိုင်ပွဲကို၂၀၁၃ က စတင်ကျင်းပခဲ့ခြင်းဖြစ်ပြီး အစောပိုင်း ၂၀၁၃ – ၂၀၁၇ အထိ Amazing Sports Lab Japan နှင့် Tokyo Football Association တို့မှ ဦးစီးကျင်းပခဲ့သ ည်။
ပထမဆုံးပြိုင်ပွဲကို ၂၀၁၃ သြဂုတ်(၂၇)ရက် တွင် စတင်ပြုလုပ်ခဲ့ပြီး အသင်းပေါင်း (၁၂) သင်း ဝင်ရောက် ယှဉ်ပြိုင်ခဲ့ရာ ဘာစီလိုနာအသင်းက လီဗာပူးလ်ကို အနိုင်ရ ဗိုလ်စွဲခဲ့သည်။
ဒုတိယအကြိမ် ပြိုင်ပွဲတွင် အသင်းပေါင်း (၁၆) သင်း ရှိလာပြီး ဘာစီလိုနာ၊ အေစီမီလန် စသည့် ဥရောပ ထိပ်တန်း နှစ်သင်းအပြင် အင်ဒိုနီးရှားကလပ် Asiop Apacinti အသင်း၊ ဂျပန်အခြေစိုက် ကလပ်အသင်းငယ်များ၊ ဂျေလိဂ် ကလပ်အသင်းများ ဝင်ရောက်ယှဉ်ပြိုင်ခဲ့ရာ ယင်းပြိုင်ပွဲတွင်လည်း ဘာစီလိုနာအသင်းက ချန်ပီယံဆု ထပ်မံရယူနိုင်ခဲ့သည်။
၂၀၁၅ တွင် ကျင်းပခဲ့သည့် တတိယအကြိမ်မြောက် ပြိုင်ပွဲတွင် စပိန်မှ ဘာစီလိုနာနှင့် အက်စ်ပန်ညို၊ အာဂျင်တီးနားမှ ဒီပို့တီဗို ကာမီအိုနီရို့စ်၊ ဗီယက်နမ်မှ ယူ – ၁၂ လက်ရွေးစင် အသင်းများလည်း ပါဝင်ယှဉ်ပြိုင်ခဲ့သည်။
ယင်းပြိုင်ပွဲ ဆီမီးဖိုင်နယ်တွင် (၂)နှစ်ဆက် ချန်ပီယံဆုရထားသည့် ဘာစီလိုနာအသင်းမှ တိုကျို ယူ – ၁၂ အသင်းကို အရေးနိမ့်ပြီး ဗိုလ်လုပွဲတွင် တိုကျို ယူ – ၁၂ အသင်းနှင့် အက်စ်ပန်ညိုတို့ ဆုံတွေ့ခဲ့ပြီးပွဲချိန်အတွင်း သရေကျနေ၍ ပင်နယ်တီ အဆုံးအဖြတ် ကန်သွင်းရာအက်စ်ပန်ညိုက အနိုင်ရပြီး ချန်ပီယံ ဖြစ်ခဲ့သည်။
ယင်းနောက် ပြိုင်ပွဲအပေါ် စိတ်ဝင်စားမှု များလာခဲ့ပြီး ပရီးမီးယားလိဂ်ကလပ်အသင်းများဖြစ်သည့် အာဆင်နယ်နှင့် မန်စီးတီး၊ ဂျာမနီကလပ် ဘိုင်ယန်မြူးနစ် စသည့်အသင်းများ အပြင် တရုတ်၊ ထိုင်း၊ စင်ကာပူ၊ သြစတြေးလျ၊ နိုင်ဂျီးရီးယားတို့မှ အသင်းများလည်းဝင်ရောက် ယှဉ်ပြိုင်ခဲ့သည်။
ပြီးခဲ့သည့် ၂၀၂၃ က ကျင်းပသည့် ပြိုင်ပွဲတွင် မြန်မာ ယူ – ၁၂ အသင်း ပါဝင်ယှဉ်ပြိုင်ခဲ့ပြီး အုပ်စုတွင်း၌ ပြိုင်ပွဲ၏ အအောင်မြင်ဆုံးဖြစ်သော ဘာစီလိုနာအသင်းနှင့် တွေ့ဆုံခဲ့သည်။
