ပေကျင်း၊ဩဂုတ် ၂၉
ကမ္ဘာ့အင်အားကြီးနှစ်နိုင်ငံအကြား တင်းမာမှုများမြင့်တက်လာမည်ကို လျှော့ချသည့်အနေဖြင့် တရုတ် – အမေရိကန်တွေ့ဆုံဆွေးနွေးရန် ပေကျင်းသို့ရောက်ရှိနေသည့် မစ္စတာဆူလီဗန်သည် တရုတ်သမ္မတရှီနှင့် တွေ့ဆုံဆွေးနွေးခဲ့ကြောင်းသိရသည်။
မစ္စတာဆူလီဗန်နှင့်တွေ့ဆုံစဉ် သမ္မတရှီက တရုတ်အနေဖြင့် အမေရိကနှင့်ဆက်ဆံရေးကို တည်ငြိမ်မှုရရှိရန်ကြိုးပမ်းလျက်ရှိပြီး ယခုကဲ့သို့ အရာရာပြောင်းလဲနေပြီး မုန်တိုင်းထန် နေသည့်ကမ္ဘာကြီးတွင် နိုင်ငံများအနေဖြင့် ဖယ်ထုတ်ခြင်း၊ နောက်ပြန်သွားခြင်းတို့မလုပ်သင့်ဘဲ စည်းလုံးမှုနှင့် ညှိနှိုင်းဆောင်ရွက်သင့်ကြောင်းပြောကြားခဲ့သည်။
မစ္စတာဆူလီဗန်ကမူ အမေရိကန်သမ္မတဂျိုးဘိုင်ဒင်အနေဖြင့်လည်း တရုတ်နှင့်ဆက်ဆံရေးတွင် ပဋိပက္ခကိုရှောင်ရှားကာ လာမည့်သီတင်းပတ်များတွင် သမ္မတဘိုင်ဒင်အနေဖြင့် ရှီနှင့်ပိုမိုထိတွေ့ဆက်ဆံနိုင်ခြေရှိကြောင်းပြောသည်။
ဆူလီဗန်နှင့်ရှီတို့တွေ့ဆုံပြီးနောက် နှစ်နိုင်ငံသမ္မတများအကြား ဖုန်းဖြင့်ဆက်သွယ်ဆွေးနွေးရန်လည်း စီစဉ်ခဲ့ကြကြောင်းသိရှိရသည်။
ယခုဆွေးနွေးမှုတွင် နှစ်နိုင်ငံလုံးသည် ပွင့်ပွင့်လင်းလင်းနှင့်ခိုင်လုံပြီး အပြုသဘောဆောင်စွာဆွေးနွေးမှုခဲ့ကြကြောင်း အိမ်ဖြူတော်ကပြောကြားခဲ့သည်။
Source : ရိုက်တာ/အာရ်အယ်လ်