ဒုဋ္ဌဝတီမြစ်ရေသည် ယနေ့ ညနေ (၃)နာရီခွဲအချိန်တွင် မြစ်ငယ်မြို့၏ စိုးရိမ်ရေမှတ် ၂၈ ဒဿမ ၅၄ ပေ (၈၇၀ စင်တီမီတာ)အထက်သို့ (၁)ပေခွဲကျော်ရောက်ရှိလာပြီဖြစ်ကာ နောက်တစ်ရက်အတွင်း (၄)ပေခန့် ဆက်လက်မြင့်တက်လာနိုင်ကြောင်း မိုး/ဇလ က ထုတ်ပြန်ထားသည်။
ယနေ့ နံနက်ပိုင်းအချိန်တွင် မြစ်ငယ်မြို့၏ စိုးရိမ်ရေမှတ်အောက် (၁)ပေခွဲခန့်တွင် ရောက်ရှိနေပြီး နောက်တစ်ရက်အတွင်း စိုးရိမ်ရေမှတ်သို့ ရောက်ရှိနိုင်ကြောင်းထုတ်ပြန်ခဲ့ပြီးနောက် ထပ်မံထုတ်ပြန်ခဲ့ခြင်းဖြစ်သည်။
ထို့ကြောင့် အဆိုပါမြို့ရှိ မြစ်ကမ်းအနီးနှင့် မြေနိမ့်ပိုင်းနေထိုင်သူများ အထူးသတိပြုနေထိုင်ကြရန် ထပ်မံနှိုးဆော်ထားသည်။
ယနေ့ မြန်မာစံတော်ချိန် (၁)နာရီခွဲအချိန် မိုး/ဇလ၏ တိုင်းထွာချက်များအရ ဘင်္ဂလားပင်လယ်အော်အရှေ့မြောက်ပိုင်းနှင့် ယင်းနှင့်ဆက်စပ် လျက်ရှိသော ဘင်္ဂလားဒေ့ရှ်နိုင်ငံအ ရှေ့တောင်ပိုင်းကမ်းခြေတို့တွင် ဖြစ်ပေါ်နေသော လေဖိအားနည်းရပ်ဝန်းသည် ပိုမို အားကောင်းသော လေဖိအားနည်းရပ်ဝန်း အဖြစ် အနောက်-အနောက်မြောက်ဘက်သို့ရွေ့လျားနိုင်ပြီး၊ မနက်ဖြန် စက်တင်ဘာ (၁၄)ရက်တွင် ပိုမိုအားကောင်းလာနိုင်ကာ အိန္ဒိယနိုင်ငံ၊ အနောက်ဘင်္ဂလားပြည်နယ်ကမ်းရိုးတန်း နှင့် ယင်းနှင့်ဆက်စပ်လျက်ရှိသော ဘင်္ဂလားပင်လယ်အော် အနောက်မြောက်ပိုင်းတို့၌ မုန်တိုင်းငယ် (Depression)အဖြစ်သို့ ရောက်ရှိနိုင်သည်ဟု မိုး/ဇလက ခန့်မှန်းထားသည်။
ကပ္ပလီပင်လယ်ပြင်နှင့် ဘင်္ဂလားပင်လယ်အော်တောင်ပိုင်းတို့တွင် မုတ်သုံလေ အားကောင်းနေပြီး၊ ကျန်ဘင်္ဂလားပင်လယ်အော်တွင် မုတ်သုံလေ အားအလွန် ကောင်းနေသည်ဟု အသိပေးထားသည်။
ပုံစာ – ဒုဋ္ဌဝတီမြစ်ရေတက်မှုကြောင့် ရေဝင်နစ်မြုပ်မှုကြုံရသည့် ပြည်သူများအား ကူညီကယ်ဆယ်ပေးနေသည့် မြင်ကွင်း (ဓာတ်ပုံ – လောကပါလ လူမှုကူညီရေးအသင်း)
