ရှမ်းပြည်နယ်မြောက်ပိုင်းအတွင်း တိုက်ပွဲများကြောင့် ရှမ်းပြည်နယ်တောင်ပိုင်းသို့ နေရပ်စွန့်ခွာ တိမ်းရှောင်နေသည့် ဒေသခံအချို့မှာ ယင်းဒေသ ရေကြီးမှုဖြစ်စဉ်အတွင်း အသက်ဆုံးရှုံးခဲ့ရသူများရှိနေသည်ဟု ကျောက်မဲဒေသခံတစ်ဦးထံက သိရသည်။
ရှမ်း/မြောက် ဒေသခံစစ်ရှောင်များမှာ ရွှေညောင်၊ ညောင်ရွှေနှင့် ကလောမြို့သို့ တိမ်းရှောင်နေစဉ် ရေဘေးကြောင့် အသက်ဆုံးရှုံးခဲ့သူ ကျောက်မဲမြို့တစ်ခုတည်းမှ ဒေသခံစစ်ရှောင် (၁၁)ဦး ပါဝင်ခဲ့ကြောင်း ၎င်းက ဆိုသည်။
“ကျောက်မဲမြို့ စစ်ဘေးရှောင် ပြည်သူထဲမှ သေဆုံးသူ (၁၁)ယောက်လို့ သိပေမဲ့ ဘယ်သူဘယ်ဝါဆိုတာကိုတော့ စုံစမ်းနေဆဲပါ”ဟု ၎င်းက ဆိုသည်။
ရှမ်းပြည်နယ်တောင်ပိုင်းရှိ ရေဘေးသင့်ပြည်သူများထံသို့ ရှမ်း/မြောက် ဒေသခံ လူမှုကူညီရေးအဖွဲ့အချို့က ရေဘေးဒဏ်အဆိုးဆုံးခံရသည့် ကျေးရွာများသို့အရောက် ထောက်ပံ့ကူညီရန် ပြင်ဆင်နေကြကြောင်း သိရသည်။
အလားတူ လားရှိူးအခြေစိုက် Freedom Youth Volunteers -FYV အဖွဲ့ကလည်း ရှမ်း/တောင်ရေဘေးသင့်ပြည်သူများအတွက် သွားရောက်လှူဒါန်းမည်ဟု ဆိုထားသည်။
“ရေဘေးမှာ ရှမ်းပြည်အတွက် လှူတာသိပ်မရှိလို့ FYO က တောင်ပိုင်းအလှူရှင်နည်းတဲ့မြို့တွေဆီအထိ ရောက်အောင်လှူပါမည်” ရေးသားမျှဝေထားသည်ကိုတွေ့ရသည်။
ဓာတ်ပုံ-CJ
