ပဲခူးတိုင်း၊ တောင်ငူမြို့ရှိ စစ်တောင်းမြစ်ရေသည် ယင်းမြို့၏စိုးရိမ်ရေမှတ်အထက် ၃ ပေခွဲခန့်ကျော်လွန်ရောက်ရှိနေသည်ဟု မိုးလေဝသနှင့်ဇလဗေဒညွှန်ကြားမှုဦးစီးဌာနမှ ယနေ့ စက်တင်ဘာ ၂၀ ရက်ည ၆ နာရီက ထုတ်ပြန်ခဲ့သည်။
စစ်တောင်းမြစ်ရေသည် တောင်ငူမြို့၏ စိုးရိမ်ရေမှတ်အထက် ၃ပေခွဲခန့်ကျော်လွန်ရောက်ရှိနေပြီး လာမည့် ၂၄ နာရီအတွင်း ၃ လက်မခန့်ကျဆင်းနိုင်သည်ဟုလည်း မိုးဇလကထုတ်ပြန်ခဲ့သည်။
ထို့ပြင် စစ်တောင်းမြစ်ရေသည် မဒေါက်မြို့တွင်လည်း မြို့၏စိုးရိမ်ရေမှတ်အထက် ၅ ပေကျော် ကျော်လွန်ရောက်ရှိနေကာ လာမည့် ၂၄ နာရီအတွင်း ၃ လက်မခန့်ကျဆင်းလာနိုင်သည်ဟု ထုတ်ပြန်ခဲ့သည်။
ထို့ကြောင့် တောင်ငူမြို့နယ်နှင့် မဒေါက်မြို့အ တွင်းရှိ မြစ်ကမ်းအနီးနှင့်မြေနိမ့်ပိုင်းနေထိုင်သူ များအနေဖြင့် ရေဘေးလွတ်ရာနေရာများသို့ ရှောင်ရှားနေထိုင်ကြရန် မိုးဇလကအသိပေးနှိုး ဆော်ခဲ့သည်။
တောင်ငူမြို့နယ်၌ ပြီးခဲ့သည့်ရက်ပိုင်းအတွင်းက မိုးသည်းထန်စွာရွာသွန်းပြီး မြစ်ရေချောင်းရေများမြင့်တက်ခဲ့ရာ ရပ်ကွက်/ကျေးရွာများအတွင်းရှိ နေအိမ်များ၊လမ်းများပေါ်သို့ ရေဝင်ရေကျော်မှုများဖြစ်ပေါ်ခဲ့သဖြင့် ရေဘေးသင့်သူများမှာ ယာယီရေဘေးရှောင်စခန်းများတွင် ခိုလှုံနေရကြောင်း သိရသည်။
