ရှမ်းပြည်နယ်တောင်ပိုင်း အင်းလေးဒေသအတွင်း သွားလာရေးခက်ခဲကာ အလှူရှင် အရောက်နည်းနေသေးသည့် ကျေးရွာများရှိ ဒေသခံရေဘေးသင့်ပြည်သူများပြန်လည်ထူထောင်ရေးအတွက် ရှမ်းပြည်မြောက်ပိုင်း အလှုရှင်အဖွဲ့က သွားရောက်ကူညီရန် ယမန်နေ့ စက်တင်ဘာ(၂၅)ရက်က စတင်ထွက်ခွာခဲ့ပြီဖြစ်ကြောင်း အဆိုပါ ရေဘေးသင့်အရေး ဦးဆောင်သူတစ်ဦး ပြောသည်။
ရှမ်း/မြောက်အလှူရှင်အဖွဲ့အနေဖြင့် ရှမ်းပြည်တောင်ပိုင်း၊ မြောက်ပိုင်မခွဲခြားဘဲ လူသားချင်းစာနာစိတ်ဖြင့် ပရဟိတစိတ်ကိုအရင်းခံကာ ထောက်ပံ့ကူညီရန် ရည်ရွယ် ကူညီခြင်းဖြစ်သည်ဟု ဆို သည်။
“ကျွန်တော်တို့ အင်းလေးဒေသက ကူညီမှုတွေ သိပ်ပြီးမရောက်သေးတဲ့ ကျေးရွာတွေကို သွားရောက်ကူညီမှာပါ။ အခု ရေက ပြန်ကျဖို့ နှစ်လလောက်ကြာမယ်လို့သိရတယ်။ ရေက ပြန်ကျနေတယ်ဆိုပေမယ့် ရေထွက်ပေါက်မရှိတော့ ကျေးရွာတွေ နစ်မြှုပ်နေဆဲလို့ သိရတယ်”ဟု ၎င်းက ဆိုသည်။
၎င်းတို့အနေဖြင့် ရေဘေးသင့်ပြည်သူများအား ကူညီထောက်ပံ့ရာတွင် စားနပ်ရိက္ခာများအပြင် ခြင်ထောင်၊ စောင်မှအစ လျှပ်စစ်မီးမရရှိသေးသဖြင့် ဖယောင်းတိုင်အဆုံး လှူဒါန်းသွားမည်ဖြစ်ပြီး ဒေသခံများ၏ လိုအပ်ချက်အပေါ်မူတည် ၍ ထပ်မံ ကူညီထောက်ပံ့မှုများဆောင်ရွက်သွားရန် စီစဉ်ထားကြောင်း သိရသည်။
ရေကြီးရေလျှံဖြစ်ပွားခဲ့သည့် အင်းလေးဒေသအတွင်း အလှူရှင် အရောက်နည်းသည့် ကျေးရွာများမှာ အင်းတိန်ရွာ၊ ပြင်လိမ့်အောက်ရွာ၊ သရက်သုံးပင်ရွာနှင့် လယ်ပြင်ရွာတို့အပြင် အခြားကျေးရွာများလည်းရှိနေသေးပြီး၊ အင်းတိန်ရွာအား ညောင်ရွှေမှ စက်လှေဖြင့် သွားမည်ဆိုပါက တစ်နာရီကျော်ကြာမြင့်ကာ၊ ပြင်လိမ့်အောက်ရွာသို့ သွားမည်ဆိုပါက မိနစ် (၄၀)ခန့် သွားရကြောင်း ပြင်လိမ့်အောက်ရွာ ဒေသခံတစ်ဦးက ပြောသည်။
အလှူရှင် အရောက်ပေါက်နည်းသည့်အဆိုပါ ကျေးရွာများရှိ ဒေသခံအချို့မှာ ညောင်ရွှေမြို့သို့ လာရောက်၍ လှူဒါန်းပေးမည့်အလှူရှင်များအတွက် လမ်းပြခေါ်ဆောင်ပေးခြင်းများ ဆောင်ရွက်ပေးမည်ဖြစ်ကြောင်း သိရသည်။
