လက်နက်ကိုင်အဖွဲ့ဝင်များသည် တနင်္သာရီတိုင်း၊ ထားဝယ်မြို့နယ်ရှိ ရေး-ထားဝယ်ရထားလမ်းပိုင်းပေါ်မှ တံတားတစ်စင်းကို ယမန်နေ့ စက်တင်ဘာ ၂၅ ရက်ညနေပိုင်းက မိုင်းခွဲဖျက်ဆီးခဲ့ကြသည်ဟု မြန်မာ့မီးရထားက ထုတ်ပြန်ခဲ့သည်။
ရေး-ထားဝယ်ရထားလမ်းပိုင်း၏ ရေဖြူဘူတာနှင့်ထားဝယ်ဘူတာကြား ရထားလမ်းမိုင်တိုင်အမှတ် ၃၆၄/၁၁ နှင့် ၃၆၄/ ၁၂ ကြားရှိ တံတားအမှတ်(၆ဝ၆)မောင်မယ်ရှောင်တံတားအား မိုင်းခွဲဖျက်ဆီးခဲ့ကြခြင်းဖြစ်သည်။
မိုင်းခွဲဖျက်ဆီးခံရမှုကြောင့် တံတား၏အောက်ခံကန့်လန့်ဖြတ်သံဘောင်(၂)ချောင်း၊ အလျား လိုက်သံဘောင်(၂)ချောင်း၊ ၇၅ ပေါင်သံလမ်း (၂)ချောင်း၊ သံလမ်းထိန်း Guard Rail (၂)ချောင်းနှင့် တံတားအထူးသစ်သားဇလီဖားများပျက်စီး ဆုံးရှုံးခဲ့သဖြင့် မြန်မာ့မီးရထား၏ ကျွမ်းကျင်ဝန်ထမ်းများက အမြန်ဆုံးပြန်လည်ပြုပြင်နိုင်ရန် ဆောင်ရွက်လျက်ရှိသည်။
လက်နက်ကိုင်အဖွဲ့များ၏ အကြမ်းဖက်မှုကြောင့် ၂၀၂၁ ခုနှစ်၊ ဖေဖော်ဝါရီလမှစ၍ လက်ရှိအချိန်အထိ မြန်မာ့မီးရထားလမ်းကွန်ရက်တစ်ခုလုံးတွင် ရထားလမ်းနှင့် ရထားဘူတာနယ်မြေအတွင်း ဗုံးထောင်မိုင်းခွဲ/ဖျက်ဆီးမှု(၇၉)ကြိမ်၊ ရထားတံတား/သံလမ်းများအားမိုင်းခွဲဖျက်ဆီးမှု(၁၇၂)ကြိမ်၊ ဘူတာအဆောက်အဦနှင့်ဝန်ထမ်းနေအိမ်များအား မီးရှို့ဖျက်ဆီးမှု(၁၆)ကြိမ်ကျူးလွန်ခဲ့ကြကြောင်း သိရသည်။
