လက်နက်ကိုင်လမ်းစဥ်ကို စွန့်လွှတ်ပြီး နိုင်ငံရေးပြဿနာကို နိုင်ငံရေးနည်းလမ်းဖြင့် ဖြေရှင်းရန် လက်နက်ကိုင်အဖွဲ့များအား ဖိတ်ခေါ်ကြောင်း နစက မှ ပြောကြားလာသည်။
အဆိုပါ ဖိတ်ခေါ်ချက်အား ယနေ့ စက်တင်ဘာ (၂၆) ရက်တွင် နစက၏ သတင်းထုတ်ပြန်ရေးအဖွဲ့က ထုတ်ပြန်ကြေညာခဲ့ခြင်း ဖြစ်သည်။
ယခုဖိတ်ခေါ်ချက်တွင် တိုင်းရင်းသား လက်နက်ကိုင်အဖွဲ့အစည်းများတင်မကဘဲ PDF အဖွဲ့များကိုပါ လက်နက်ကိုင်လမ်းစဉ်ကို စွန့်လွှတ်၍ ပါတီနိုင်ငံရေး လမ်းကြောင်း ၊ ရွေး ကောက်ပွဲလမ်းကြောင်းတို့မှတဆင့် နိုင်ငံရေးနည်းဖြင့်ဖြေရှင်းရန် ဖိတ်ခေါ်ထားသည်ကို တွေ့ရသည်။
နစက ၏ အန္တိမရည်မှန်းချက်ဖြစ်သော လွတ်လပ်ပြီးတရားမျှတသည့် ပါတီစုံဒီမိုကရေစီအထွေထွေရွေးကောက်ပွဲကျင်းပ၍ ထွက်ပေါ်လာသည့် အစိုးရအား နိုင်ငံတော်အာဏာလွှဲအပ်ရေးကို မမှိတ်မသုန်ဦးတည်ဆောင်ရွက်နေသည်ဟုလည်း အဆိုပါ ထုတ်ပြန်ချက်တွင် ဖော်ပြထားသည်။
ထိုသို့ ဆောင်ရွက်နေသော်လည်း နိုင်ငံရေးပြဿနာအား နိုင်ငံရေးနည်းလမ်းဖြင့်ဖြေရှင်းခြင်းမပြုဘဲ လက်နက်ကိုင်လမ်းစဉ်၊ အကြမ်းဖက်လမ်းစဉ်တို့အား ရွေးချယ်အသုံးပြုခဲ့ကြသည့် လူပုဂ္ဂိုလ်၊ အဖွဲ့အစည်းများကြောင့် နိုင်ငံတော်၏ လူသားအရင်းအမြစ်များ၊ နိုင်ငံတော်၏အခြေခံအဆောက်အအုံများ၊ ပြည်သူတို့၏အသက်အိုးအိမ်စည်းစိမ်များဆုံးရှုံးခဲ့ရပြီး နိုင်ငံတော်တည်ငြိမ်အေးချမ်းရေးနှင့် ဖွံ့ဖြိုးတိုးတက်ရေးကိုများစွာ အဟန့်အတားဖြစ်ရကြောင်းလည်း နစက က ဆိုသည်။
လက်ရှိအချိန်၌ နစက အနေဖြင့် ပါတီစုံဒီမိုကရေစီ အထွေထွေရွေးကောက်ပွဲအတွက် မဲစာရင်းမှန်ကန်မှုကို အထောက်အကူပြုစေမည့် သန်းခေါင်စာရင်းကောက်ယူခြင်းကို အောက်တိုဘာ (၁) ရက်တွင် စတင်မည်ဖြစ်ပြီး ရွေးကောက်ပွဲအတွက် ကြိုတင်ပြင်ဆင်မှု လုပ်ငန်းစဉ်များကို အားသွန်ခွန်စိုက်ဆောင်ရွက်လျက်ရှိကြောင်းလည်း သိရသည်။
လက်နက်ကိုင်လမ်းစဉ်နှင့် အကြမ်းဖက်လမ်းစဉ်တို့ကြောင့် နိုင်ငံတော်တွင်ဖြစ်ပေါ်ခဲ့ရသည့် ဆုံးရှုံးနစ်နာမှုများကိုထောက်ရှု၍ ထာဝရငြိမ်းချမ်းရေးနှင့်ဖွံ့ဖြိုးတိုးတက်ရေးကို ပြည်သူများနှင့်အတူ လက်တွဲဖော်ဆောင်နိုင်ရန် လက်နက်ကိုင်အဖွဲ့များအနေဖြင့် ပါတီနိုင်ငံရေးလမ်းကြောင်း၊ ရွေးကောက်ပွဲလမ်းကြောင်းတို့မှ နိုင်ငံရေးပြဿနာကို နိုင်ငံရေးနည်းလမ်းဖြင့်ဖြေရှင်းရန် ဆက်သွယ်နိုင်ကြောင်းလည်း အသိပေးထားသည်။
ပုံစာ- တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူစာချုပ်(NCA) (၈)နှစ်မြောက် နှစ်ပတ်လည်နေ့အခမ်းအနားပုံရိပ်များ
