၂၀၂၄ ခုနှစ် လူဦးရေနှင့်အိမ်အကြောင်းအရာသန်းခေါင်းစာရင်းအား အောက်တိုဘာ ၁ ရက်မှစတင်၍ နေပြည်တော်အပါအဝင် တိုင်းနှင့်ပြည် နယ်အားလုံးတွင် စာရင်းကောက်ယူမှုများပြု လုပ်ခဲ့ရာ ယင်းနေ့ညပိုင်းအထိ လူဦးရေ ၄ သိန်းခန့်အား ကောက်ယူနိုင်ခဲ့ကြောင်း လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာနထံမှ သိရသည်။
အိမ်ထောင်စုပေါင်း(၈၈၀၀၀)ကျော်နှင့်လူဦးရေ (၃၉၀၀၀၀)ကျော်ကို လူဦးရေနှင့်အိမ်အကြောင်း အရာသန်းခေါင်စာရင်းကောက်ယူရေးအဖွဲ့ဝင်များက ကောက်ယူပေးခဲ့ပြီးနောက် လဝက ၏ ဆာဗာသို့ပေးပို့ခဲ့ကြကြောင်း သိရသည်။
ထို့ပြင် စာရင်းကောက်ယူရေးအဖွဲ့ဝင်များမှ ကောက်ယူရန်ကျန်ရှိနေသည့် အိမ်ထောင်စုနှင့်လူဦးရေများကို အောက်တိုဘာ ၁၅ ရက်အထိ သက်ဆိုင်ရာ နေရာများအလိုက် ဆက်လက်ကောက်ယူသွားမည်ဖြစ်ကြောင်း သိရသည်။
” စာရင်းကောက်ယူရာမှာ မထပ်မကျန်အောင် စာရင်းကောက်ကွက်တွေဖွဲ့စည်းပြီး စာရင်းစစ်၊ စာရင်းကောက်တွေကို မြေပုံနဲ့တကွ တာဝန်ပေးအပ်ထားလို့ ကျန်ရှိဖို့အခွင့်အလမ်းနည်းပါတယ်။ ကျန်ရှိခဲ့ရင်လည်း ပြည်သူတွေအနေနဲ့မိမိတို့အိမ်ကို သန်းခေါင်စာရင်းလာမကောက်ရင် သက်ဆိုင်ရာ ရပ်ကွက်/ကျေးရွာအုပ်ချုပ်ရေးမှူးတွေကတစ်ဆင့် မြို့နယ်သန်းခေါင်စာရင်းကော်မတီတွေကို ဆက်သွယ်သတင်းပေးတာနဲ့ လာရောက် စာရင်းကောက်ယူမှာပါ”ဟု လဝက ကပြောကြားထားသည်။
ထို့အတူ Hotline ဖုန်းနံပါတ်များဖြစ်သည့် ဖုန်း ၀၆၇၄၃၁၀၆၄၊ ၀၆၇၄၁၅၃၉ နှင့် ၀၆၇၄၃၁၅၄၂ တို့သို့ဆက်သွယ်၍ သန်းခေါင်စာရင်းလာရောက်ကောက်ယူရန် အကြောင်းကြားနိုင်ကြောင်း သိရသည်။
သန်းခေါင်စာရင်းကောက်ယူသူများ စာရင်းကောက်ယူရာ၌ ဘေးကင်းလုံခြုံမှုရှိစေရန် လုံခြုံရေးအဖွဲ့အစည်းများမှ ပူးပေါင်းဆောင်ရွက်လျက်ရှိပြီး လုံခြုံရေးကန့်သတ်ချက်ရှိသော မြို့နယ်အချို့တွင် လုံခြုံရေးအစီအမံများချမှတ်၍ စာရင်းကောက်ယူမည့်ရက်အား တိုးမြှင့်ပေးသွားမည်ဖြစ်ကြောင်း သိရသည်။
