ပြည်ပထွက်အလုပ်လုပ်လိုပါက PJ ပတ်စပို့လျှောက်ထားရန် အလုပ်သမားဝန်ကြီးဌာန ထပ်မံတိုက်တွန်း

မြန်မာနိုင်ငံမှ ပြည်ပတွင် သွားရောက်အလုပ်လုပ်မည့်သူများသည် ပြည်ပအလုပ်အကိုင် နိုင်ငံကူးလက်မှတ် (Passport for Job -PJ)ဖြင့်သာ ထွက်ခွါရန် အလုပ်သမားရေးဝန်ကြီးဌာနက ယမန်နေ့ အောက်တိုဘာ ၃ ရက် တွင် ထပ်မံထုတ်ပြန်သည်။

ပြည်ပကို အလုပ်လုပ်မည့် သူများအနေဖြင့် အလည်အပတ်နိုင်ငံကူးလက်မှတ်( Passport for Visit-PV) ဖြင့် ပြည်ပအလုပ်အကိုင် ဗီဇာများယူကာ ပြည်ပနိုင်ငံများကို ထွက်ခွါနေကြရာ လေဆိပ်တွင် စစ်ဆေးသည့်အချိန်၌ သတ်မှတ်ချက်နှင့်မညီ၍ ထွက်ခွါခွင့်နှင့် အခြားဆုံးရှုံးနစ်နာမှုများ ရှိလာသည်ဟု ထုတ်ပြန်ချက်အရ သိရသည်။

ထို့ကြောင့် ပြည်ပတွင် အလုပ်လုပ်ကိုင်လိုသူများအနေဖြင့် PJ နိုင်ငံကူးလက်မှတ်အမျိုးအစား လျှောက်ထားရန်နှင့် ပြည်ပအလုပ်အကိုင် အလုပ်သမားသက်သေခံကတ် (OWIC) လျှောက်ထားရယူရန်တို့ကို ထုတ်ပြန်ချက်၌ တိုက်တွန်းထားသည်။

လက်တွေ့တွင်လည်း ရန်ကုန်အပြည်ပြည်ဆိုင်ရာ လေဆိပ်၌ ပြည်ပသို့ PV နိုင်ငံကူးလက်မှတ်ကိုင်ဆောင်ကာ အလုပ်ဖြင့် ထွက်ခွါမည့်သူများအပေါ် ထွက်ခွါခွင့်မပြုဘဲ ပြန်လွှတ်သည့် ဖြစ်စဉ်များလည်း ရှိနေသည်။

“ဒူဘိုင်းလို နေရာကို PV နဲ့သွားမယ်ဆို သေချာတယ်၊ ပြန်လွှတ်ခံရလိမ့်မယ်နော် ၊PV နဲ့သွားပြီး အလုပ်လုပ်မယ်လို့ သေချာသလောက်ရှိတဲ့လူတွေကို ပြန်လွှတ်တာများတယ်။” ဟု ပြည်ပအလုပ်အကိုင်ရှာဖွေရေးအေဂျင်စီ တစ်ခုကပြောသည်။

ထို့အပြင် သတ်မှတ်ချက်များအရ အသက် ၁၈ နှစ်မှ၂၁ နှစ်အထိ လူငယ်များနှင့် အသက် ၃၂ နှစ်အထက်အမျိုးသားများကိုသာ ပြည်ပတွင် အလုပ်လုပ်ရန် ပို့ဆောင်ခွင့်ရကြောင်းလည်း ၎င်းက ပြောသည်။