ကမ္ဘာတစ်ဝန်း ဆန္ဒပြပွဲများ ပေါ်ပေါက်စေခဲ့ကာ အရှေ့အလယ်ပိုင်းတခွင်သို့ ပဋိပက္ခ ပျံ့နှံ့သွားနိုင်သည့် အခြေအနေဖြစ်ပေါ်လာသော စစ်ပွဲကို အစပြုခဲ့ရာ ဟားမတ်စ်တို့တိုက်ခိုက်မှု၏ ပထမဆုံးနှစ်ပတ်လည် အထိမ်းအမှတ်ကို တနင်္လာနေ့(အောက်တိုဘာ ၇) တွင် အစ္စရေးနိုင်ငံသားများ ပြုလုပ်ခဲ့ကြသည်။
ပြီးခဲ့သည့်နှစ် အောက်တိုဘာ ၇ ရက် တိုက်ခိုက်မှုတွင် ဟားမတ်စ်တို့က ဒုံးကျည်များပစ်လွှတ်ခြင်းဖြင့် အစပြုခဲ့သည့် နံနက် ၆း၂၉ နာရီ၌ အောက်မေ့ဖွယ် အခမ်းအနားများနှင့် ဆန္ဒပြမှုများကို ဂျေရူဆလင်နှင့် အစ္စရေးနိုင်ငံတောင်ပိုင်းတို့တွင် စတင်ပြုလုပ်ခဲ့ကြသည်။
အစ္စရေးအစိုးရ၏ စာရင်းဇယားများအရ ဟားမတ်စ်တို့၏ တိုက်ခိုက်မှုအတွင်း လူ ၁၂၀၀ ေ-သဆုံးခဲ့ကာ ၂၅၀ ခန့်သည် ဂါဇာဒေသသို့ ဖမ်းဆီးခေါ်ဆောင်သွားခံခဲ့ရသည်။
ဂျေရုဆလင်ရှိ ဝန်ကြီးချုပ် နေတန်ယာဟု၏ နေအိမ်အပြင်ဘက်တွင် ချစ်ခင်ရသူများ၏ ဓါတ်ပုံများကို ကိုင်ဆောင်ထားသော ဓ-ါးစာခံများ၏ မိသားစုဝင်များဦးဆောင်သည့် လူ ၃၀၀ ဝန်းကျင်သည် ေ-သဆုံးရသူများအတွက် တစ်မိနစ်ငြိမ်သက် ဂုဏ်ပြုခဲ့ကြသည်။
“အကြမ်းဖက်မှု၊ အကြောက်တရား၊ ဒေါသနဲ့ စိတ်ပျက်အားငယ်ရမှုတွေ အတောမသတ်တဲ့ နေ့တစ်နေ့ ၂၀၂၃ အောက်တိုဘာ ၇ ရက်ဖြစ်စဉ်ထဲကနေ ကျွန်တော်တို့ ရုန်းမထွက်နိုင်သေးပါဘူး” ဟု Yuval Baron က ပြောသည်။ သူ၏ ယောက္ခမဖြစ်သူ Keith Siegel သည် ဂါဇာတွင် ဓ-ါးစာခံအဖြစ် ဖမ်းဆီးခံထားရသည်။
“ဝမ်းနည်းကြေကွဲဖွယ် နေ့တစ်နေ့ဖြစ်တယ်ဆိုပေမယ့် ဓ-ါးစာခံတွေကို ပြန်ခေါ်ဆောင်ဖို့ရာ မြင့်မြတ်တဲ့ မစ်ရှင်ရှိနေသေးတယ်ဆိုတာကို အစ္စရေး ပြည်သူတွေ၊ ငါတို့ရဲ့ ဝန်ကြီးချုပ်နဲ့ ငါတို့ကိုယ်ငါတို့ ပြန်သတိပေးဖို့ ဒီနေ့ကို အတူတကွ စတင်ချင်ပါတယ်” ဟုလည်း သူက ဆိုခဲ့သည်။
လူပေါင်း ၃၆၀ ကျော်ေ-သဆုံးကာ ဒါဇင်နှင့်ချီ၍ ဖမ်းဆီးခေါ်ဆောင်သွားခံခဲ့ရသော ဂီတပွဲပြုလုပ်ခဲ့ရာ Reim တွင် အောက်မေ့ဖွယ်အခမ်းအနားကို သမ္မတ Isaac Herzog က ကမကထပြု ဆောင်ရွက်ခဲ့သည်။
“သတ်ဖြတ်ခံခဲ့ရသူတွေ၊ အဓမ္မပြုကျင့်ခံခဲ့ရသူတွေ၊ ဓါးစာခံဖမ်းဆီးခံခဲ့ရသူတွေအားလုံးကို ကျွန်တော်တို့ အမြဲ သတိရနေမှာပါ။ တစ်ချိန်တည်းမှာပဲ ကျွန်တော်တို့ဟာ ထူးကဲတဲ့ ကြံ့ခိုင်မှုကိုလည်း မြင်တွေ့ခဲ့ကြရပါတယ်။ ကျွန်တော်တို့မှာ အံ့သြစရာကောင်းတဲ့ ပြည်သူတွေရှိတယ်၊ ဒီနေ့မှာ အဲဒါကို အားကောင်းအောင်လုပ်ပြီး စုစည်းညီညွတ်ကြဖို့ တောင်းဆိုပါတယ်” ဟု Herzog က ပြောခဲ့သည်။
နယ်စပ်အနီး အခြေချအိမ်ရာနယ်မြေဖြစ်သော Kibbutz ကျေးရွာများနှင့် မြို့များတွင်လည်း အောက်မေ့ဖွယ်အခမ်းအနားများကို တစ်နေ့တာလုံး ကျင်းပခဲ့ကြကြောင်း သိရသည်။
Ref: သည်ကိုရီးယားတိုင်းမ်