မကွေးတိုင်းဒေသကြီး၊ မင်းဘူး(စကု)မြိုနယ်၊ ရွှေစက်တော်မန်းချောင်း အပန်းဖြေဆင်စခန်းတွင် ဆင်လိမ္မာလေးများ၏ ဆန်းသစ် ကကွက်ဆန်းများနှင့် ဖျော်ဖြေပေးရာ လူအများမှ စိတ်ဝင်တစား ကြည့်ရှုကြကြောင်း လာရောက်လည်ပတ်သည့် ခရီးသွားပြည်သူများထံမှ သိရသည်။
ရွှေစက်တော်မန်းချောင်း၊ အပန်းဖြေဆင်စခန်းတွင် ၂၀၁၉ ခုနှစ် ဖေဖော်ဝါရီ (၉) ရက်မှစတင်ကာ ယခုနှစ်တွင် ဆင်လိမ္မာလေးများက လူအများ စိတ်ဝင်စားဖွယ်ရာကောင်းသော ကကွက်အသစ် အဆန်းများဖြင့် တီထွင်ဆန်းသစ်ကာ ကပြဖျော်ဖြေလျက်ရှိကြောင်း သိရသည်။
ထို့ပြင် ၎င်းရွှေစက်တော်မန်းချောင်း အပန်းဖြေဆင်စခန်း၌ ဆင်လိမ္မာလေးများ၏ ကကွက်ဆန်းများအပါအဝင် အခြားအဆင့်မြှင့်တင်ခြင်းလုပ်ငန်းများဖြစ်သော VIP ဆောင်များ တိုးချဲ့ပြင်ဆင်ခြင်း၊ ဆင်စခန်းပရိဝုဏ်အတွင်း ကွန်ကရစ်လမ်းအရှည် (၁၉၀၀) ပေ၊ ခင်းပေးထားခြင်း၊ အရိပ်ရ၍ အသီးအမှည့်များအား ဆင်စာအဖြစ် ကျွေးမွေးရန် မန်ကျည်းပင် (၄၀၀၀) စိုက်ပျိုးထားခြင်းတို့ကို ယခင်နှစ်များနှင့် မတူအောင် အဆင့်မြှင့်တင်ထားကြောင်း ဆင်စခန်းတာဝန်ခံများထံမှ သိရသည်။
“ရွှေစက်တော်မန်းချောင်းအပန်းဖြေဆင်စခန်းက ရွှေစက်တော်ဘုရားနဲ့ (၂) မိုင်ပဲ ဝေးတယ်။ ခြေတော်ရာ နှစ်ဆူကို ဖူးပြီး ဆင်စခန်းကို သွားတယ်။ ဆင်လိမ္မာလေးတွေရဲ့ ကကွက် အသစ်လေးတွေနဲ့ ဖျော်ဖြေတာကို ကြည့်တယ်။ အရမ်းသဘောကျပါတယ်။ ဆင်စီးပြီး မန်းချောင်းတစ်လျှောက် တောတောင်ရေမြေနဲ့ သဘာဝလှတရားတွေကိုလည်း ကြည့်ရတာ အပန်းပြေတယ်”ဟု ခရီးသွား ဧည့်သည့် တစ်ဦးက ပြောသည်။
အဆိုပါ ဆင်စခန်းတွင် ဆင် (၁၄) ကောင်ရှိပြီး ဆင်စီးပြီးအပန်းဖြေမည်ဆိုပါက ဆင်စီးခနှုန်းထားများအနေဖြင့်မှာ ပြည်ပခရီးသွား ဧည့်သည် တစ်ဦးလျှင် ငွေကျပ် (၁၀၀၀၀) နှင့် ပြည်တွင်း ခရီးသွား တစ်ဦးလျှင် ငွေကျပ် (၅၀၀၀) ကျသင့်မည်ဖြစ်ကြောင်း သိရသည်။
ထိုအပြင် ဆင်စခန်းတွင် ရိုးရိုးတည်းခိုဆောင် တစ်လုံးလျှင် ကျပ် (၄၀၀၀၀) ၊ အထူးတည်းခိုဆောင် အခန်းတစ်ခန်းလျှင် ကျပ် (၇၀၀၀၀) ဖြင့် ရေမီးအစုံပါဝင်သော တည်းခိုဆောင်များလည်း စီစဉ်ထားရှိကြောင်း သိရသည်။
ပြီးခဲ့သည့် နှစ်များအတွင်းကလည်း ရွှေစက်တော်ဘုရားဖူးကာလဖြစ်သော တပို့တွဲလဆန်း (၅) ရက်မှ နှစ်ဆန်း (၁) ရက်အထိ (၄)လတာ ကာလများတွင်သာ အနယ်နယ်အရပ်ရပ်မှ ဘုရားဖူးသူနှင့် လာရောက်လေ့လာလည်ပတ်သူ အများအပြားရှိကြောင်း သိရသည်။
