ဆိုးလ်၊အောက်တိုဘာ ၁၆
ကိုရီးယားဒီမိုကရက်တစ်ပြည်သူ့သမ္မတနိုင်ငံ (DPRK) က ၎င်း၏တောင်ပိုင်းနယ်စပ်မှ အရှေ့ဘက်နှင့်အနောက်ဘက်ရှိ တောင်ကိုးရီးယားသို့ဆက်သွယ်ထားသော ကားလမ်းများနှင့် မီးရထားလမ်းများကို လုံးဝပိတ်ဆို့ထားလိုက်ပြီဖြစ်ကြောင်း ကိုရီးယားဗဟိုသတင်းအေဂျင်စီ (KCNA) ကဖော်ပြခဲ့သည်။
မြောက်ကိုရီးယားသည် ပြီးခဲ့သည့် အောက်တိုဘာ ၁၅ ရက်နေ့ကတည်းက တောင်ကိုရီးယားနှင့်ဆက်ထားသည့် ရထားလမ်း၊ကားလမ်းများကို ကိုရီးယား အလုပ်သမားပါတီ ဗဟိုစစ်ကော်မရှင်၏အမိန့်အရ ကိုရီးယားပြည်သူ့တပ်မတော် (KPA) ရဲ့ စစ်ဦးစီး အရာရှိချုပ်ကဖြတ်တောက်ပစ်ခဲ့ခြင်းဖြစ်သည်။
အောက်တိုဘာ ၁၅ ရက်နေ့တွင် Kamho-ri ၊ Kosong County၊ Kangwon ပြည်နယ်ရှိ မီတာ ၆၀ ရှည်သည့်ကားလမ်းနှင့်ရထားလမ်းပိုင်းများ ပန်မွန်ခရိုင် Tongnae-ri ရှိမီတာ ၆၀ အရှည်ရှိသည့် ကားလမ်းနှင့်ရထားလမ်းများကိုပါ ဖောက်ခွဲဖျက်ဆီးခဲ့ပြီး Kaesong မြူနီစပယ်ကိုလည်း လုံးလုံးလျားလျားပိတ်ဆို့ထားပြီးဖြစ်သည်ဟု မြောက်ကိုရီးယားအမျိုးသားကာကွယ်ရေးဝန်ကြီးဌာနမှ ပြောရေးဆိုခွင့်ရှိသူကပြောကြားခဲ့သည်။
လမ်းများကို ဖောက်ခွဲဖျက်ဆီးခဲ့သော်လည်း ပတ်ဝန်းကျင်နှင့်ဂေဟစနစ်ကို ထိခိုက်မှုမရှိသလို နှစ်နိုင်ငံကြား ဆက်သွယ်ထားသည့်အရာများကို အပြီးသတ်ဖျက်ဆီးခဲ့ပြီဖြစ်ကြောင်းလည်း ပြုံယမ်း၏တာဝန်ရှိသူတစ်ဦးကပြောကြားခဲ့သည်။
မြောက်ကိုရီးယားအနေဖြင့် ပိတ်ထားသည့်တောင်ဘက်နယ်စပ်ကို အမြဲတမ်းခိုင်ခံ့အောင် ဆက်လက်လုပ်ဆောင်သွားမည်ဖြစ်ကြောင်းလည်းပြောကြားခဲ့သည်။
ကိုရီးယားကျွန်းဆွယ်ရှိ မရေရာသောအခြေအနေများကြားတွင် မြောက်ကိုရီးယားသည် တောင်ကိုရီးယားနှင့်ဆက်သွယ်ထားသော လမ်းများနှင့်မီးရထားလမ်းများကို လုံးဝဖြတ်တောက်ပစ်မည်ဟုအောက်တိုဘာ ၉ ရက်ကအတိအလင်းပြောကြားခဲ့ခြင်းလည်းဖြစ်သည်။
Source : ရှင်းဟွာ
