သရုပ်ဆောင် ယွန်းရွှေရည်က အခုလတ်တလောမှာ ဇာတ်ကားတွေ ရိုက်ကူးထားပြီး နယ်ရှိုးတွေဆိုနေတာဖြစ်ကြောင်း သိရပါတယ်။ သူမရဲ့ နယ်ရှိုးပွဲဆိုဖြစ်တဲ့အကြောင်းကိုတော့ အခုလိုပြောပြခဲ့ပါတယ်။
“ညီမအခုလတ်တလောမှာ မေမြို့မှာ ဇာတ်ကားရိုက်ကူးနေပါတယ်။ ပြီးတော့ မန္တလေးမှာ ရန်ပုံငွေပွဲလေး သီချင်းဆိုဖို့ရှိပါတယ်။ နယ်ရှိုးပွဲ တွေဆိုတာ တစ်နှစ်ခွဲ၊ နှစ်နှစ်လောက်ရှိပြီ။ ပရိသတ်တွေလည်း အား ပေးကြပါတယ်။ အခုနောက်ပိုင်း သီချင်းဆိုဖို့ ချိတ်တာများလာတယ်။ အခွေထုတ်ဖို့ထိတော့ မလုပ်နိုင်သေးပါဘူး။ သီချင်းဆိုတာကိုတော့ ဝါသနာပါတယ်လေ။ အနုပညာအလုပ်ဆိုရင် ဘယ်အနုပညာ အလုပ်မဆို ဝါသနာပါပြီးသားပါ။ သရုပ်ဆောင်အလုပ်နဲ့ သီချင်းဆိုတော့ ကွာခြားပါတယ်။ သီချင်းဆိုတာက ဇာတ် သဘင်ပွဲတွေနဲ့ စတိတ်ရှိုးတွေမှာဆိုရတယ်လေ။ ည၁နာရီ၊ ၂နာ ရီလောက်ထိ သီဆိုရတယ်။ အနုပညာအလုပ်က လွယ်ကူတယ်ဆိုတာကို မရှိတာ။ ဘယ်အလုပ်မဆို ခက်ခဲ တယ်”လို့ ပြောပါတယ်။
အခုနောက်ပိုင်း သရုပ်ဆောင်အသစ်တွေများလာ တာကို ကြိုဆိုနေတဲ့ ယွန်းရွှေရည်က အနုပညာအလုပ် ကို ဖြတ်လျှောက်ဘဝကနေစခဲ့တာ ဖြစ်တဲ့အတွက် ကြိုးစားဖို့လိုကြောင်းကိုတော့ ..
“အခုနောက်ပိုင်းမှာ သရုပ်ဆောင်တွေလည်း အရမ်းများလာတယ်။ ကြိုဆိုပါတယ်။ အရေးကြီးတာက ကိုယ်လုပ်တဲ့အလုပ်ကို တန်ဖိုးထားပြီးတော့ ကိုယ်ဘာဖြစ် ချင်လဲ၊ ကိုယ်ဖြစ်ချင်တဲ့အလုပ်၊ ဒီအနုပညာအလုပ်မှာ ပေါက်မြှောက်အောင် လုပ်စေချင်တယ်။ ညီမ အနုပညာ သက်တမ်း၈နှစ်ကျော်ရှိနေပြီ။ ညီမဆိုလည်း ဖြတ် လျှောက်ဘဝကနေစတာလေ။ ညီမတို့က ဒီလိုဘဝက နေ တက်လာရတဲ့အတွက် အဲဒီအတွက် ညီမမှာ အခုချိန်ထိ ပြည့်စုံလုံလောက်တဲ့ အနုပညာနဲ့ ပတ်သက်တဲ့ပညာတွေက မလုံလောက်သေးဘူး။ အနုပညာဆိုတာ ရှာဖွေလေ တွေ့ရှိလေပဲဆိုတဲ့အတိုင်းပါပဲ။ အခုက အသစ်တွေလည်း အများကြီးပေါ်လာပြီး၊ ကိုယ်တွေလည်း အသက်အရွယ် ရလာပြီ။ နေရာဆိုတာကတော့ ညီမတို့ အနုပညာရှင်တွေက မျက်နှာထားနဲ့ အလုပ်လုပ်စားရတဲ့လူတွေဆိုတော့ ကိုယ့် အသက်အရွယ်ပိုင်းခြားမှာ ရရှိတဲ့အခွင့်အရေးလေးတွေကို အကောင်းဆုံးကြိုးစားနေတယ်”လို့ ဆိုပါတယ်။
သရုပ်ဆောင်ယွန်းရွှေရည်က ဗီဒီယိုဇာတ်ကားတွေအပြင် သူမပါဝင် ရိုက်ကူးထားတဲ့ ရုပ်ရှင်ဇာတ်ကားကြီးတွေရှိပေမယ့် ရုံတင်ပြသဖို့ အချိန်စောင့်နေရကြောင်း သိရပါတယ်။
ချယ်ရီ
