ပရိသတ်တွေရဲ့ အချစ်တော်မော်ဒယ်လ်သရုပ်ဆောင်ထွန်းကိုကိုကတော့ ဇန်နဝါရီလ ၁၆ ရက်နေ့မှာ အသက်၃ဝ ပြည့်သွားခဲ့ပြီဖြစ်ပါတယ်။ မွေးနေ့အထိမ်းအမှတ်အဖြစ်မနက်ပိုင်းမှာ မိသားစုတွေနဲ့ အတူတူ ဘုရားသွားဖြစ်တဲ့အကြောင်းကို ထွန်းကိုကိုက ” ဒီနှစ်မွေးနေ့မှာတော့ အဖေ၊ အမေ မိသားစုလေး ဘုရားသွားဖူးတယ်။ လျှောက်လည်းဖြစ်တယ်။ မုန့်စားကြတယ်။ မိသားစုနဲ့ အတူတူဆုံပြီးတော့ သွားဖြစ်တဲ့အတွက်ပျော်လည်းပျော်တယ်။ ပီတိလည်းဖြစ်တယ်။ မိဘကတော့ လူတိုင်းမှာ အစားထိုးလို့မရတဲ့ အရာပါ။ ကျွန်တော်လည်း ရှိတဲ့အချိန်လေးမှာ မိဘကိုများများ ပိုချစ်ပေးတယ်။ မရှိတော့မှ တမ်းတနေမယ်၊ ငိုကြွေးနေမယ်၊ ပူဆွေးနေမယ်ဆို အလကားပါ။ ရှိတဲ့အချိန်လေးမှာ ကိုယ်ကအကောင်းဆုံး လုပ်ပေးနိုင်သမျှ လုပ်ပေးရမယ်” လို့ ပြောပြခဲ့ပါတယ်။
မွေးနေ့နဲ့ ပတ်သက်ပြီး အလှူအတန်းတွေ လုပ်ဖြစ်တဲ့ အကြောင်းကိုလည်း ”မွေးနေ့အလှူ အနေနဲ့ ကျွန်တော်ပြီးခဲ့တဲ့ ရက်ပိုင်း အတွင်းက အရံစတီတော်ရဲ့စိန်ဖူးတော်လှူဖြစ်တယ်။ ကျွန်တော်တို့ ထွန်းကိုကို ချစ်ကြသူများနဲ့အတူ မီးသင်္ဂြိုဟ်စက်လေး လှူဖြစ်တယ်။ အလှူအတန်းကတော့ အမြဲတမ်းလုပ်ဖြစ်တယ်။ နောက်ထပ်လည်း ထွန်းကိုကို ချစ်ကြသူများနဲ့ အတူအလှူတွေလည်း ထပ်လုပ်ဖို့လည်း ရှိပါတယ်” လို့ ထွန်းကိုကိုက ပြောပြပါတယ်။ မွေးနေ့လက်ဆောင်အနေနဲ့ သင်္ကန်းရရှိတာနဲ့ ပတ်သက်ပြီးတော့လည်း ထွန်းကိုကိုက မွေးနေ့မှာ မွေးနေ့လက်ဆောင်အနေနဲ့ မွေးနေ့ကိတ်တွေလည်း အများကြီးရတယ်။ မွေးနေ့လက်ဆောင်တွေလည်း တော်တော်များများ ရတယ်။ ကျွန်တော့်ရဲ့ We Love တွေက မွေးနေ့လက်ဆောင်အနေနဲ့ သင်္ကန်းလက်ဆောင်ပေးတယ်။ သင်္ကန်းလက်ဆောင် ရတယ်ဆိုတာက We Love တွေက ဘုန်းကြီး ဝတ်ခိုင်းတာ။ ဘုန်းကြီးက ဝတ်ဖို့လည်း အစီအစဉ်ရှိပါတယ်။ ၂ လ ပိုင်းလောက်ဝတ်ဖြစ်မှာပါ” လို့လည်း ပြောပြခဲ့ပါသေးတယ်။ ညနေပိုင်းမှာ ဧည့်ခံပွဲကို Golden City မှာရှိတဲ့ A Bar မှာ We Love Tun Ko Ko အဖွဲ့သားများ၊ ဧည့်ပရိသတ်များ၊ အနုပညာ မောင်နှမများနဲ့ အတူတူ ပျော်ပျော်ရွှင်ရွှင်ကျင်းပပြုလုပ်ခဲ့ပါသေးတယ်။
ခိုင်ဝါဝင်း