ရန်ကုန်တိုင်းဒေသကြီး ဒဂုံတောင်ပိုင်း မြို့နယ်မှာရှိတဲ့ အောင်မြင့်မိုရ် ကိုဗစ် ၁၉ ရောဂါကုရေးစင်တာမှာ ကိုဗစ် ၁၉ ရောဂါပိုး ရှိ၊မရှိ ကို အခမဲ့ စစ်ပေးနေတယ်လို့ ယင်း ကိုဗစ်စင်တာ မှ တာဝန်ရှိသူတစ်ဉီးက ပြောပါတယ်။
အောင်မြင့်မိုရ် ကိုဗစ်စင်တာ အနီးက အောင်မြင့်မိုရ် ဓမ္မာရုံမှာ အပတ်စဉ် အဂ်ါနေ့ နဲ့ ကြာသပတေး နေ့တွေမှာ မနက် ၉ နာရီက စပြီး စစ်ဆေးပေးနေတာပါ။ မိမိထံမှာ ကိုဗစ်ရောဂါ ပိုး ရှိတယ်လို့ သံသယ ရှိသူ ဘယ်သူမဆို လာရောက် စစ်ဆေးနိုင်တယ်လို့ သိရပါတယ်။
အခု ကိုဗစ်တတိယလှိုင်းမှာ အောင်မြင့်မိုရ် ကိုဗစ်-၁၉ရောဂါ ကုသရေး စင်တာ ကို ဇူလိုင်လ(၂၀) ရက်က ဖွင့်လှစ်လိုက်တာဖြစ်ပါတယ်။ လက်ရှိမှာ ကိုဗစ်လူနာ ၁၀၀ ကျော်ကို လက်ခံကုသပေးနေပေမယ့် လူနာများ ဆက်လက်တိုးချဲ့ လက်ခံကုသပေနိုင်ဖို့အတွက်ကိုလည်း ဆောင်ရွက်နေတယ်လို့ သိရပါတယ်။
လူနာများကို ကောင်းမွန်စွာကုသရေးအတွက် လုံလောက်တဲ့ ဆရာဝန်၊ သူနာပြု၊ စေတနာ့ဝန်ထမ်းများ ရရှိရေး၊ လူနာများကို ကုသရာမှာ အွန်လိုင်းမှ တစ်ဆင့် ဆွေးနွေးအကြံပြုပေးနိုင်ရေး၊ အောက်ဆီဂျင် လုံလောက် စွာအချိန်မီရရှိနိင်ရေး၊ ရောဂါကုသရေးအတွက် ဆေးဝါး နဲ့ အထောက်အကူပစ္စည်းများ ထားရှိနိုင်ရေး၊ လူနာများအဆင်ပြေစွာ တက်ရောက်ကုသမှုခံယူနိုင်ရေး နဲ့ စင်တာရဲ့ အဆောက်အဉီပစ္စည်းများ သေသပ်ကောင်းမွန်စွာထားရှိရေး တို့ကိုလည်း ယင်း ကိုဗစ်စင်တာ မှ တာဝန်ရှိသူများက ဆောင်ရွက်လျက်ရှိပါတယ်။
အောင်မြင့်မိုရ် ကိုဗစ်-၁၉ ရောဂါ ကုသရေးစင်တာ ကို မြန်မာနိုင်ငံမှာ ကိုဗစ်ရောဂါကူးစက်မှု ဒုတိယလှိုင်း ဖြစ်ပွားစဉ် ကတည်း က ဖွင့်လှစ်ခဲ့တာဖြစ်ပြီး ယင်းကာလမှာ စင်တာမှ ကိုဗစ်အတည်ပြု လူနာ(၂၅၀၀)လောက်ကို လက်ခံ ကုသပေးခဲ့ပါတယ်။ ကိုဗစ်ဒုတိယလှိုင်းမှာ အောင်မြင့်မိုရ် ကိုဗစ်-၁၉ ရောဂါကုသရေးစင်တာ အတွက် လိုအပ်သမျှ ကို OXYGEN Donors and Volunteers Group က ပံ့ပိုးလှူဒါန်းပေးခဲ့တာြဖစ်ပါတယ်။
အောင်မြင့်မိုရ် ကိုဗစ်-၁၉ ရောဂါ ကုသရေးစင်တာ ကို ကျန်းမာရေး နှင့် အားကစားဝန်ကြီးဌာန ရဲ့ ဦးဆောင်လမ်းညွှန်မှု၊ ရန်ကုန်တိုင်းဒေသကြီး စီမံအုပ်ချုပ်ရေးကောင်စီရဲ့ စီမံပံ့ပိုးကူညီမှု နဲ့ ကျန်းမာရေးဉီးစီးဌာနမှ အနီးကပ်ကြီးကြပ်မှု တို့နဲ့ စေတနာ၊မေတ္တာ၊ ကရုဏာ အရင်းခံ ထားကြတဲ့ OXYGEN Donors and Volunteers Group၊ မြန်မာနိုင်ငံလိုင်စင်ရ ကန်ထရိုက်တာများအသင်းချုပ်၊ မြန်မာနိုင်ငံ တရုတ်ကုန်သည်ကြီးများအသင်းချုပ်၊ မြန်မာ-အိန္ဒိယ-တရုတ် အပြည်ပြည်ဆိုင်ရာပူးပေါင်းဆောင်ရွက်ရေး နဲ့ စီးပွားဖွံ့ဖြိုးတိုးတက်ရေးအသင်း၊ မြန်မာနိုင်ငံဘာသာပေါင်းစုံမိတ်ဆွေများအဖွဲ့၊ ရွှေသံလွင်(SKY NET) တို့ဦးဆောင်ပြီး အခြားမိတ်ဖက် အသင်းအဖွဲ့များရဲ့ ပူးပေါင်းပါဝင်လှူဒါန်း ကူညီမှုများ နဲ့ ကိုဗစ်ရောဂါ ခံစားနေရတဲ့ ပြည်သူတွေကို ကုသပေးနိုင်ဖို့ ဖွင့်လှစ်ထားတာဖြစ်ကြောင်း သိရှိရပါတယ်။
