ကုန်စည်များကိုသင်္ဘောတင်သည့်နေ့မှ သုံးလအတွင်း ပို့ကုန်ရငွေများ လက်ခံရရှိခြင်း ရှိ၊ မရှိ စိစစ်မည်

(Unicode)

ကုန်စည်များကိုသင်္ဘောတင်သည့်နေ့မှ သုံးလအတွင်း ပို့ကုန်ရငွေများ လက်ခံရရှိခြင်း ရှိ၊ မရှိ စိစစ်မည်

၂၀၁၄ခုနှစ် နိုင်ငံခြားသုံးငွေ စီမံခန့်ခွဲမှုစည်းမျဉ်း အပိုဒ် ၃၅ပါ ပြဌာန်းချက်ဖြစ်သည့် “ နိုင်ငံခြားသုံးငွေများ ရောင်းဝယ်ဖောက်ကားသည့် လုပ်ငန်းလိုင်စင်ရရှိသူသည် ပို့ကုန်အမှန်တကယ် တင်ပို့ခဲ့သည့် အထောက်အထားများအရ ကုန်စည်များကို သင်္ဘောတင်သည့်နေ့မှ ခြောက် လအတွင်း ပို့ကုန်တင်ပို့သူများက ပို့ကုန်ရငွေများ လက်ခံရရှိခြင်း ရှိ/မရှိ ကို စိစစ်ရမည်”ကို မူလစာသားများမပယ်ဖျက်ဘဲ ခြောက်လအတွင်းနေရာတွင် သုံးလအတွင်းဟု ဗဟိုဘဏ်က ယနေ့ နိုဝင်ဘာ ၁၀ရက်တွင် အမိန့်ကြော်ငြာစာအမှတ် ၄၆/၂၀၂၁ထုတ်ပြီး ပြင်ဆင်လိုက်သည်။

မြန်မာနိုင်ငံတော်ဗဟိုဘဏ်သည် နိုင်ငံခြားသုံးငွေစီမံခန့်ခွဲမှုဥပဒေပုဒ်မ ၄၉ ပုဒ်မခွဲ (က) အရ အပ်နှင်းထားသော လုပ်ပိုင်ခွင့်ကိုကျင့်သုံး၍ ပြည်ထောင်စုသမ္မတမြန်မာနိုင်ငံတော် ပြည်ထောင်စု အစိုးရအဖွဲ့၏ သဘောတူညီချက်ဖြင့် နိုင်ငံခြားသုံးငွေစီမံခန့်ခွဲမှုစည်းမျဉ်း အပိုဒ် ၃၅ အား ပြင်ဆင်လိုက်သည်ဟု မြန်မာနိုင်ငံတော်ဗဟိုဘဏ်ဥက္ကဋ္ဌဦးသန်းညိန်းက ကြေညာချက်ထဲ လက်မှတ်ရေးထိုးဆိုသည်။

ပို့ကုန်လုပ်ငန်းရှင်တစ်ဦးက “ပို့ကုန်ရငွေတွေကို အခုနောက်ပိုင်း တော်တော်လေး စိစစ်နေတယ်”ဟု မှတ်ချက်ပြုသည်။

ဗဟိုဘဏ်က ၂၀၁၉ ခုနှစ်အတွင်း ပို့ကုန်တင်ပို့ခဲ့ပြီး ပို့ကုန်ရငွေ ပြန်လည်ဝင်ရောက်ရန် ကျန်ရှိသည့် ကုမ္ပဏီ ၆၆၃ခုကို စာရင်းရှင်းလင်းရန် ရက်ပေါင်း (၃၀) သတ်မှတ်ထားပြီး သတ်မှတ်ကာလ ကုန်ဆုံးသည်အထိ စာရင်း ရှင်းလင်းခြင်းမရှိလျှင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ ပို့ကုန်/ သွင်းကုန်ဆိုင်ရာ လုပ်ထုံးလုပ်နည်းများအရလည်းကောင်း၊ နိုင်ငံခြားသုံးငွေ စီမံခန့်ခွဲမှုဥပဒေပါ ပြဋ္ဌာန်းချက်များအရလည်းကောင်း ဆက်လက်ဆောင်ရွက်သွားမည်ဟု သတိပေးထားသည်။

စာရင်းရှင်းရန်ကျန်သည့် ကုမ္ပဏီ ၆၆၃ခုသည် အမေရိကန်ဒေါ်လာ ၅၇၆သန်းကျော်ကို စာရင်းရှင်းကြရမည်ဖြစ်သည်။

အလားတူ ၂၀၁၈ခုနှစ် အတွင်း ပို့ကုန်တင်ပို့ခဲ့ပြီး ပို့ကုန်ရငွေ ပြန်လည်ဝင်ရောက်ရန် ကျန်ရှိသည့် ကုမ္ပဏီ များအားလည်း စာရင်းရှင်းလင်းရန် သတိပေးထားသည်ကိုလည်းတွေ့ရသည်။

(Zawgyi)