စားနပ်ရိက္ခာဖူလုံရေးအကူအညီပေးသည့်အဖွဲ့များမှ လူဦးရေ ၁ ဒသမ ၄ သန်းအား အရေးပေါ်အကူအညီများပေးထားပြီးဖြစ်ဟု UNOCHA ထုတ်ပြန်
မြန်မာနိုင်ငံတစ်ဝှမ်းတွင် နေရပ်စွန်းခွာတိမ်းရှောင်နေရသူဦးရေမှာ ဧပြီ ၁၁ ရက်အထိ ၉၁၂၇၀၀ ဦးရှိပြီဖြစ်ကြောင်း UNOCHA Myanmar မှထုတ်ပြန်ခဲ့သည်။
အဆိုပါ နေရပ်စွန့်ခွာတိမ်းရှောင်နေရသူများအနက် ချင်းပြည်နယ်၊စစ်ကိုင်းတိုင်းနှင့်မကွေးတိုင်းတို့မှ လူဦးရေ ၃ သိန်းကျော်ပါဝင်ကြောင်း ထုတ်ပြန်ချက်၌ရေးသားထားသည်။
နေရပ်စွန့်ခွာတိမ်းရှောင်နေရသူများနှင့်နေရပ်စွန့်ခွာလာသူများအား လက်ခံကူညီပေးနေသည့် ရွာခံများအား စားနပ်ရိက္ခာဖူလုံရေးအကူအညီပေးသည့်အဖွဲ့များမှ အရေးပေါ်အကူအညီများအား သွားလာရခက်ခဲသည့်အခြေအနေများကြားမှ ကူညီပေးခဲ့သည်ဟု ထုတ်ပြန်ရေးသားထားသည်။
ထိုသို့ နေရပ်စွန့်ခွာတိမ်းရှောင်လာသူများအနက် လူဦးရေ ၁ ဒသမ ၄ သန်းကျော်အား မှအရေးပေါ်အကူအညီများပေးအပ်ခဲ့ပြီးဖြစ်ကာ ယင်းသို့ကူညီပေးမှုသည် ၂၀၂၂ ခုနှစ်အတွက် အဆိုပါ ကဏ္ဍတွင်လျာထားသည့် ၃ လစာပမာဏဖြစ်ကြောင်း UNOCHA ၏ထုတ်ပြန်ချက်၌ရေးသားထားသည်။
ထို့ပြင် ပဋိပက္ခဖြစ်ပွားလျက်ရှိသည့် ဒေသများ၌ မြေမြှုတ်မိုင်းနှင့်ပေါက်ကွဲစေတတ်သည့်ပစ္စည်းများ၏ အန္တရာယ်မှာမြင့်တက်လာနေသဖြင့် မိုင်းအန္တရာယ်ကင်းရှင်းရေးဆိုင်ရာ အသိပညာပေးလုပ်ငန်းများအား ဆက်လက်ဆောင်ရွက်သွားမည်ဖြစ်ကြောင်း ထုတ်ပြန်ချက်၌ရေးသားထားသည်။
အလားတူ နွေရာသီဖြစ်၍ အချို့နေရာများ၌ ရေ ရရှိမှုအခက်အခဲ၊ပတ်ဝန်းကျင်နှင့်တကိုယ်ရေသန့်ရှင်းရေးဆိုင်ရာများတွင် သိသာစွာလိုအပ်လျက်ရှိကာ ရခိုင်ပြည်နယ်ရှိ ယာယီစခန်းများတွင်နေထိုင်သူများမှာ ဝမ်းပျက်ဝမ်းလျှောရောဂါကူးစက်ပျံ့နှံ့နိုင်သည့် အခြေအနေနှင့်ကြုံတွေ့နေရသည်ဟု ရေးသားထားသည်။
ထို့ကြောင့် ရခိုင်ပြည်နယ်ရှိ ယာယီစခန်းများ၌ မိုးရာသီမရောက်မီအချိန်တွင် အဆောက်အဦးများပြုပြင်ရန်လိုအပ်လျက်ရှိကာ လူဦးရေ ၂၈၀၀၀ ကျော်နေထိုင်သည့် အိမ်တန်းရှည် ၅၅၀ လုံးခန့် သည် နေထိုင်ရန်သင့်လျော်ခြင်းမရှိကြောင်း ထုတ်ပြန်ချက်၌ရေးသားထားသည်။
မိုးရာသီမရောက်မီ ဘေးအန္တရာယ်ကျရောက်နိုင်ဖွယ်ရှိသည့်ဒေသများ၌ အရေးပေါ်အခြေအနေများကြုံတွေ့လာပါက အချိန်နှင့်တပြေးညီ ထိရောက်စွာဆောင်ရွက်နိုင်ရန် ကြိုတင်ပြင်ဆင်ရေးအစီအစဉ်များအား UNOCHA မှပြင်ဆင်လျက်ရှိကြောင်း ထုတ်ပြန်ချက်အရသိရသည်။
