မလေးဝန်ကြီးချုပ်ဟောင်းမဟာသီ က အမေရိကန်ဖွဲ့လိုက်သော အင်ဒို-ပစိဖိတ် စီးပွားရေးအဖွဲ့ကို ဝေဖန်
တိုကျို၊မေ ၂၇
မလေးရှားနိုင်ငံ၏ဝန်ကြီးချုပ်ဟောင်းတစ်ဦးဖြစ်သူ မစ္စတာ မဟာသီယာမိုဟာမက် က အမေရိကန်ဦးဆောင်သော စီးပွားရေးအုပ်စုသစ်ဖွဲ့စည်းမှုကို ဝေဖန်လိုက်သည်။အကြောင်းမှာ ထိုအဖွဲ့တွင် တရုတ်နိုင်ငံအား ချန်လှပ်မည်ဆိုသည့်မူဝါဒကြောင့်ဖြစ်သည်။
တရုတ်မပါဘဲဒေသတွင်းစီးပွားရေးတိုးတက်မှုမရှိနိုင်ကြောင်းသူကပြောကြားခဲ့သည်။
ယခုပတ်အစောပိုင်းတွင် အမေရိကန်သမ္မတဂျိုးဘိုင်ဒန် က နိုင်ငံပေါင်း ၁၃ နိုင်ငံပါဝင်သော အင်ဒို – ပစိဖိတ်ဒေသ စီးပွားရေး အဖွဲ့ကိုဖွဲ့လိုက်သည်။ အမေရိကန်နှင့် အာဆီယံတို့ပိုမိုနီးကပ်စွာ လက်တွဲဆောင်ရွက်နိုင်ရန်ဟုလည်း ဘိုင်ဒင်ကဆိုခဲ့သည်။ အထူးသဖြင့် ကုန်စည်စီးဆင်းရေးလုံခြုံမှု၊ဒစ်ဂျစ်တယ်ကုန်သွယ်ရေး၊ဖွံ့ဖြိုးမြဲစွမ်းအင်နှင့်အဂတိလိုက်စားမှုတိုက်ဖျက်ရေးတို့အတွက်ပိုမိုအထောက်ကူပြုစေရန်ဖြစ်သည်။
“အမေရိကန်အနေနဲ့ တရုတ်ကိုချန်လှပ်ထားနိုင်ဖို့ အခုလို အဖွဲ့တွေဖွဲ့ပြီး အမြဲအသုံးချလေ့ရှိတယ်” ဟုလည်း မဟာသီက ဂျပန်နိုင်ငံ တိုကျိုမြို့တွင် မေ ၂၇ ကကျင်းပသည့် နိုင်ငံတကာညီလာခံ(အာရှအနာဂတ် ညီလာခံ)တွင်ပြောခဲ့သည်။
“နိုင်ငံအတော်များများကလည်း ဒါဟာစီးပွားရေးအုပ်စုမဟုတ်ပဲ နိုင်ငံရေးအရစုဖွဲ့ခြင်းတစ်မျိုးလို့ပဲ သိထားကြတာပါပဲ။”
“ပါဝင်လက်မှတ်ထိုးကြတဲ့နိုင်ငံတွေက ဩစတေးလျ၊ဘရူနိုင်း၊အိန္ဒိယ၊အင်ဒိုနီးရှား၊ဂျပန်၊မလေးရှား၊နယူးဇီလန်၊ဖိလစ်ပိုင်၊စင်္ကာပူ၊တောင်ကိုရီးယား၊ထိုင်း၊အမေရိကန်နဲ့ဗီယက်နမ်နိုင်ငံ စတာတွေဖြစ်ကြပြီး ခုလိုအတူပူးပေါင်းဆောင်ရွက်တာက ကမ္ဘာ့ GDP ရဲ့ ၄၀ ရာခိုင်နှုန်းကို ကိုယ်စားပြုတယ်လို့ဆိုကြပါတယ်။တကယ်တမ်းကျ အဲ့လိုလုပ်တာဟာ အဲ့ဒီနိုင်ငံတွေရဲ့စီးပွားရေးဖွံ့ဖြိုးတိုးတက်မှုအတွက်မကောင်းပါဘူး” ဟုလည်း မဟာသီ က အဖွဲ့ဝင်နိုင်ငံများအား ပြောခဲ့သည်။
ထို့ပြင် “တရုတ်ဟာ မလေးရဲ့အဓိကစီးပွားရေးမိတ်ဖက်ပဲ၊ကျွန်တော်တို့ဟာတရုတ်နဲ့ဘယ်လိုသော တင်းမာမှုနဲ့ပဋိပက္ခမျိုးကိုမှမလိုချင်ပါဘူး၊ပြီးတော့ကျွန်တော်တို့အနေနဲ့ ကမ္ဘာပေါ်ကနိုင်ငံတော်တော်များများထက် ပိုချမ်းသာတဲ့တရုတ်နိုင်ငံနဲ့အတူယှဉ်တွဲ နေထိုင်ရမှာပဲ၊တရုတ်ဆိုတာပျောက်ပျက်သွားမှာမဟုတ်ဘူးဆိုတာကို အမေရိကန်လဲသဘောပေါက်မယ်လို့ကျွန်တော်တို့မျှော်လင့်ပါတယ်” ဟုဆိုခဲ့သည်။
အသက် ၉၆ နှစ်ရှိပြီဖြစ်သော မဟာသီသည် မလေးရှား၏ သတ္တမမြောက် ၀န်ကြီးချုပ်အဖြစ် တာဝန်ထမ်းဆောင်ခဲ့ပြီး ဝန်ကြီးချုပ်တာဝန်ကို လေးကြိမ်တာဝန်ယူဖူးသည့် သမ္ဘာရင့် နိုင်ငံရေးသမားဖြစ်သည်။
Source – AP/ng
