ကမ္ဘောဒီးယားတွင်သွေးလွန်တုပ်ကွေးဖြစ်နူန်းမြင့်နေ၍ဖျားပါက၇၂ နာရီ အတွင်း ဆေးရုံပြရန်နိုးဆော်ထား
ယခုနှစ်ဆန်းပိုင်း၌ ကမ္ဘောဒီးယားတွင် သွေးလွန်တုပ်ကွေးရောဂါဖြစ်ပွားမှုပေါင်း ၁,၃၅၄ ခုရှိနေပြီး မနှစ်ကအရေအတွက်နှင့်နှိုင်းယှဉ်ပါက ၁၀၀ ရာခိုင်နှုန်းကျော်တက်လာသည်ဟု စနေနေ့ကသတင်းထုတ်ပြန်ချက်အရသိရှိရသည်။
ယခုနှစ်ဇန်နဝါရီလမှမေလအတွင်း ကလေးသုံးဦးသေဆုံးခဲ့သည်။သွေးလွန်တုပ်ကွေးရောဂါသည် နေ့ခင်းဘက်တွင်ကိုက်သည့် အေဒီးစ်ခြင်ကျားကိုက်ခံရခြင်းမှဖြစ်ပွားသောရောဂါတစ်မျိုးဖြစ်သည်။ကျန်းမာရေးဝန်ကြီး မစ္စတာ Mam Bunheng ကလည်း ပြည်သူများအားအိမ်အနီးနားတွင် ခြင်တွေပေါက်ဖွားရာ ဗွက်အိုင်များရှိပါက သန့်ရှင်းရေးလုပ်ခြင်း၊မလိုအပ်ပါက ဖို့ပစ်ခြင်းတို့လုပ်ကြရန်နှင့် ဘယ်ချိန်အိပ်အိပ် ခြင်ထောင်ထောင်အိပ်ရန် သတိပေးထားသည်။
သွေးလွန်တုပ်ကွေးရောဂါ ကျရောက်သော ဒေသများတွင်နေထိုင်သည့် အိမ်ထောင်စုများသို့ သွေးလွန်တုပ်ကွေးရောဂါ နှိမ်နင်းရေးအတွက် အဘိတ်ဆေးကို ဝန်ကြီးဌာနက ဆက်လက်ဖြန့်ဝေကာ ရေအိုင် ဆေးခပ်ခြင်း၊ခြင်ထောင် အဘိတ်ဆေး စိမ်ခြင်းတို့ လုပ်ဆောင်မည် ဖြစ်ကြောင်း ၎င်းကဆိုသည်။
ဆက်လက်၍ဝန်ကြီးက “မိမိတို့ကလေးများရုတ်တရက်ဖျားနာခြင်းဖြစ်ပါက မိဘများအနေဖြင့် နီးစပ်ရာဆေးရုံဆေးခန်း (သို့) ကျန်းမာရေးစင်တာများသို့ ၇၂ နာရီထက်မနောက်ကျပဲပို့ဆောင်ရန်နှင့် အိမ်တွင်ဆေးမြီးတိုဖြင့်ကြိတ်မကုရန်” မှာကြားထားသည်။
သွေးလွန်တုပ်ကွေးရောဂါသည် များသောအားဖြင့် ခေါင်းကိုက်ခြင်း၊ အဖျားကြီးခြင်း၊ပင်ပန်းနွမ်းနယ်ခြင်း၊ကြွက်သားနှင့်အဆစ်အမြစ်များ အပြင်းအထန်နာကျင်ခြင်း၊အကြိတ်များ ရောင်ရမ်းခြင်း၊ အော့အန်ခြင်းနှင့်အဖုများထွက်ခြင်းစသည့် လက္ခဏာများဖြစ်ပေါ်လာလေ့ရှိပြီး ရုတ်တရက်ထဖြစ်တတ်သည့် အဖျားရောဂါတစ်မျိုးဖြစ်သည်။
အရှေ့တောင် အာရှနိုင်ငံများတွင် သွေးလွန်တုပ်ကွေးရောဂါဖြစ်ပွားမှု အထွတ်အထိပ်ကာလသည် မေလမှ အောက်တိုဘာလအထိ မိုးရာသီကာလဖြစ်သည်။
Source – Xinhua
