လာမည့်ရွေးကောက်ပွဲတွင် လွှတ်တော် ကိုယ်စားလှယ်များကို အရည်အချင်းသတ်မှတ်မည်ဟု ပြည်ထောင်စုရွေးကောက်ပွဲကော်မရှင် တာဝန်ရှိသူပြော
လာမည့် ၂၀၂၃ ခုနှစ် အထွေထွေရွေးကောက်ပွဲတွင် ဝင်ရောက်ယှဉ်ပြိုင်မည့် လွှတ်တော်ကိုယ်စားလှယ်များ၏ ပညာအရည်အချင်းကို သတ်မှတ်သွားရန်ရှိပြီး ထုတ်ပြန် ကြေညာသွားမည်ဟု ပြည်ထောင်စုရွေးကောက်ပွဲ ကော်မ ရှင်က ပြောကြားလိုက်သည်။
ယနေ့ ဇွန်လ (၁၆) ရက် မွန်းလွဲပိုင်းက ပြုလုပ်သည့် နစ က၏ သတင်းစာရှင်းလင်းပွဲတွင် ပြည်ထောင်စု ရွေး ကောက်ပွဲ ကော်မရှင်ပြောခွင့်ရ ဦးခင်မောင်ဦးက ပြောကြားခဲ့ခြင်း ဖြစ်သည်။
”လွှတ်တော်ကိုယ်စားလှယ်တွေဟာ တိုင်းပြည်ရဲ့အုပ်ချုပ်ရေးနဲ့တရားစီရင်ရေးအပါအဝင် တိုင်းပြည်ရဲ့အရေးကြီးတဲ့ကဏ္ဍမှာ ပါဝင်လို့ သူတို့အရည်အချင်းနဲ့စွမ်းဆောင်ရည်မြင့်မားဖို့လိုတယ်။ ဒါကြောင့် လွှတ်တော်ကိုယ်စားလှယ်တွေရဲ့အရည်အချင်း သတ်မှတ်ချက် အတည်ပြုပြီးရင် ထုတ်ပြန်ဖို့ရှိပါတယ်” ဟု ဦးခင်မောင်ဦးက ပြောသည်။
၂၀၀၈ ခုနှစ် ဖွဲ့စည်းပုံအခြေခံ ဥပဒေပါ ပြဋ္ဌာန်းချက်များအရ ယခင်က လွှတ်တော်ကိုယ်စားလှယ် အရည်အချင်းသတ်မှတ်ချက်များတွင် ပညာအရည်အချင်း ကန့်သတ်ထားခြင်း မရှိဘဲ အသက်ကန့်သတ်ချက်အနေဖြင့်သာ ရှိကြောင်း သိရသည်။
အဆိုပါ သတ်မှတ်ချက်အရ ပြည်သူ့လွှတ်တော်ကိုယ်စား လှယ်နေရာအတွက် အသက် ၂၅ နှစ်ပြည့်ပြီးသူ၊ အမျိုး သားလွှတ်တော်ကိုယ်စားလှယ်နေရာအတွက် အသက် ၃၀ ပြည့်ပြီးသူ ဖြစ်ရမည်ဆိုသည့် အချက်များ ပါဝင်သည်။
ထို့အပြင် နိုင်ငံသားမိသားနှစ်ပါးက မွေးဖွားသူနဲ့ နိုင်ငံအတွင်းမှာ အနည်းဆုံး ဆယ်စုနှစ်ချီနေထိုင်ပြီးသူဖြစ်ရမည်ဆိုသည့် အချက်လည်း ပါရှိသည်။
လာမည့် ရွေးကောက်ပွဲတွင် ဝင်ရောက်ယှဉ်ပြိုင်မည့် ပါတီများ၏ ပိုင်ဆိုင်မှုများကို စစ်ဆေးသွားရန် ရှိသော် လည်း လွှတ်တော်ကိုယ်စားလှယ်များ၏ ပိုင်ဆိုင်မှုများကို စစ်ဆေးသတ်မှတ်ရန် အစီအစဉ်မရှိကြောင်းလည်း ကော်မရှင်၏ ပြောရေးဆိုခွင့်ရှိက ပြောသည်။
“လွှတ်တော်ကိုယ်စားတွေရဲ့ ပိုင်ဆိုင်မှု စီးပွားရေး ဥစ္စာ ဘယ်လောက်ရှိရမယ်ဆိုတာ သတ်မှတ်ဖို့မရှိပေမဲ့ ပါတီတစ်ခုချင်းဟာ ရှိသင့်တဲ့ဘဏ္ဍာရေးအခြေအနေရှိဖို့ လိုတာတွေပါတယ်”ဟု ဦးခင်မောင်ဦးက ပြောသည်။
လာမည့် ၂၀၂၃ ခုနှစ်တွင် ကျင်းပမည့် အထွေထွေရွေး ကောက်ပွဲတွင် PR စနစ် ကျင့်သုံးသွားမည်ဖြစ်ပြီး လက်ရှိတွင် လိုအပ်သည့် များကို ပြင်ဆင်မှုများ လုပ် ဆောင်နေကြောင်း သိရသည်။
