ဒေါ်အောင်ဆန်းစုကြည်ကို နေပြည်တော်မှာပဲ ဆက်လက်ထိန်းသိမ်းထားဆဲဖြစ်ကြောင်း ဗိုလ်ချုပ်ဇော်မင်းထွန်းပြော
နိုင်ငံတော် အတိုင်ပင်ခံပုဂ္ဂိုလ်ဟောင်း ဒေါ်အောင်ဆန်းစုကြည်ကို ရန်ကုန်မြို့က သူမ၏ နေအိမ်သို့ ပြန်လည်ပို့ဆောင်လိုက်သည်ဆိုသည့်သတင်းမှာ မှန်ကန်မှုမရှိဘဲ နေပြည်တော် အချုပ်ထောင်တွင်သာ ဆက်လက်ထိန်း သိမ်းထားကြောင်း နစက ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက ပြောသည်။
လက်ရှိထွက်ပေါ်နေသည့် သတင်းများနှင့်ပတ်သက်၍ ပေါ်ပြူလာက ဆက်သွယ်မေးမြန်းစဉ် ၎င်းက ပြန်လည်ဖြေကြားခဲ့ခြင်း ဖြစ်သည်။
“မဟုတ်ပါဘူး ။ နေပြည်တော်မှာပဲ ကောင်းမွန်စွာ ဆက်လက်ထိန်းသိမ်းထားပါတယ်” ဟု ဗိုလ်ချုပ်ဇော်မင်းထွန်းက ပြောသည်။
ဒေါ်အောင်ဆန်းစုကြည်၏ ကျန်းမာရေးအခြေအနေနှင့် ပတ်သက်၍ မေးမြန်းကြည့်ရာတွင် သူမအနေဖြင့် ကျန်း မာရေးကောင်းမွန်စွာ ရှိကြောင်းလည်း ၎င်းက ပြောသည်။
ဒေါ်အောင်ဆန်းစုကြည်နှင့် အတူနေထိုင်သူ (၈)ဦးနှင့် သူမ ၏ အချစ်တော် တိုက်ချီဒိုကိုတော့ ဇူလိုင်လ (၄) ရက်ကပင် ရန်ကုန်မြို့၊တက္ကသိုလ်ရိပ်သာလမ်းပေါ်က ခြံအမှတ် (၅၄) နေအိမ်သို့ ပြန်လည် ပို့ဆောင်ထားပြီးဖြစ်ကြောင်းသိရသည်။
ထို့အတူ နေပြည်တော် နေအိမ်ရှိ ဒေါ်အောင်ဆန်းစုကြည်၏ အသုံးအဆောင် ပစ္စည်းများကိုလည်း ခြံအမှတ် (၅၄) သို့ ပြန်လည် ပို့ဆောင်လိုက်ပြီ ဖြစ်ကြောင်းလည်း သိရသည်။
ပြီးခဲ့သည့် ရက်ပိုင်းအတွင်း အာဆီယံအထူး ကိုယ်စား လှယ် မြန်မာပြည်လာရောက်ခဲ့စဉ်ကလည်း နစက ခေါင်း ဆောင်များနှင့်တွေ့ဆုံကာ ဒေါ်အောင်ဆန်းစုကြည်အား နေအိမ်သို့ ပြန်လည်ပို့ဆောင်ပေးရန် တိုက်တွန်းသွားခဲ့သေးသည်။
တပ်မတော်က အာဏာရယူပြီး နောက်ပိုင်းတွင် ဒေါ်အောင်ဆန်းစုကြည်ကို အမှုပေါင်း (၁၉) ခုနဲ့ တရားစွဲဆိုခဲ့ပြီး လက် ရှိတွင် အမှုခြောက်မှုအတွက် ထောင်ဒဏ် (၁၁) နှစ် ချမှတ်ထားခြင်း ဖြစ်သည်။
