သီရိလင်္ကာနိုင်ငံသို့ မြန်မာနိုင်ငံ၏ လူသားချင်းစာနာမှု အကူအညီအဖြစ် ဆန်တန်ချိန် ၁၀၀၀ လှူဒါန်းမည်
စီးပွားရေးချွတ်ခြုံကျမှုနှင့် ဆိုးရွားသည့်နိုင်ငံရေးအကျပ် အတည်းများ ရင်ဆိုင်နေရသည့် သီရိလင်္ကာနိုင်ငံသို့ မြန် မာနိုင်ငံမှ လူသားချင်း စာနာမှုအကူအညီအနေဖြင့် ဆန်တန်ချိန် ၁၀၀၀ လှူဒါန်းသွားမည် ဖြစ်ကြောင်း စီးပွားကူး သန်း ဝန်ကြီးဌာနမှ သိရသည်။
အဆိုပါ လူသားချင်းစာနာမှု အကူအညီကို မြန်မာအစိုးရမှ နိုင်ငံတော်ရန်ပုံငွေကို အသုံးပြု၍ လှူဒါန်းခြင်း ဖြစ် ကြောင်း နိုင်ငံပိုင် သတင်းစာတွင်ဖော်ပြသည်။
” အကြမ်းဖျင်းကတော့ သိရိလင်္ကာမှာ အခက်အခဲတွေ ဖြစ်နေတော့ လူသားချင်း စာနာမှုအကူအညီတွေကို နိုင်ငံ တကာက ပေးကြတယ်လေ။ တရုတ်နိုင်ငံကပေးတယ်။ အိန္ဒိယက ပေးတယ်။ တခြား အိမ်နီးချင်း အာဆီယံနိုင်ငံတွေကလည်း ပေးတယ်လေ။ မြန်မာနိုင်ငံကလည်း ဆန်ပေးတာပေါ့။ အရင်အစိုးရ လက်ထက်ကလည်း ဒီလိုပဲ သီရိလင်္ကာနိုင်ငံကို ဆန်လှူဖူးတယ်။အဲဒါကို လုပ်တဲ့အနေ အထားပါပဲ ” ဟု မြန်မာနိုင်ငံ ဆန်စပါးလုပ်ငန်းရှင်များအ သင်းချုပ် ဥက္ကဋ္ဌ ဦးရဲမင်းအောင်က ပေါ်ပြူလာနယူးစ်သို့ ပြောသည်။
အဆိုပါ ဆန်လှူဒါန်းမည့် ကိစ္စနှင့် ပတ်သက်သည့် ညှိနိုင်းအစည်းအဝေးကို စီးပွားရေးနှင့် ကူးသန်းရောင်းဝယ်ရေးဝန်ကြီးဌာန အစည်းအဝေးခန်းမတွင် ဇူလိုင်လ (၁၃) ရက် နံနက်ပိုင်းက ပြုလုပ်ခဲ့ကြောင်း သိရသည်။
ယင်း အစည်းအဝေးတွင် ဝယ်ယူစုဆောင်းမည့် ဆန်အ မျိုးအစား၊ ကွန်တိန်နာငှားရမ်းမှုနှင့် အခြားလိုအပ်သည့်အကြောင်းအရာများကို ဆွေးနွေခဲ့ကြောင်း ဖော်ပြထားသော်လည်း အသေးစိတ်အချက်အလက်ကို ဖော်ပြခဲ့ခြင်းမရှိပေ။
သီရိလင်္ကာ နိုင်ငံသည် စီးပွားရေးချွတ်ခြုံကျမှုနှင့် နိုင်ငံတွင်း ပြည်သူလူထု၏ စားဝတ်နေရေး အကျပ်အတည်းများ ရင်ဆိုင်နေရမှုကြောင့် ပြည်သူလူထုက ဆန္ဒပြမှုများလုပ်ဆောင်ခဲ့ရာ သမ္မတနှင့် ဝန်ကြီးချုပ်အနေဖြင့် ရာထူးမှ နှုတ်ထွက်ပေးရမည့် အခြေအနေနှင့် ရင်ဆိုင်ခဲ့ရခြင်း ဖြစ်သည်။
ပြီးခဲ့သည့် ရက်ပိုင်းအတွင်းက ဆန္ဒပြပြည်သူများက သီရိလင်္ကာ နိုင်ငံသမ္မတအိမ်တော်နှင့် ဝန်ကြီးချုပ်အိမ်တော်တို့အား ဝင်ရောက်စီးနင်းခဲ့ရာ ဘေးလွတ်ရာသို့ ထွက်ပြေးတိမ်းရှောင်ခဲ့ရပြီး သမ္မတနှင့် ဝန်ကြီးချုပ်တို့ ရာထူးမှ နှုတ်ထွက်ပေးမည်ဖြစ်ကြောင်း ကြေညာခဲ့ရသည်။
