ဗဟိုဘဏ်က နိုင်ငံခြားငွေ ကန့်သတ်ချက်များ ထုတ်ပြန်ပြီးတဲ့နောက် ဒေါ်လာဈေး (၁) ဒေါ်လာ (၂၃၀၀) ကျော်အထိ မြင့်တက်
မြန်မာနိုင်ငံ ဗဟိုဘဏ်က ယခုရက်ပိုင်းအတွင်း နိုင်ငံခြား ငွေနဲ့ ပတ်သက်တဲ့ ကန့်သတ်ချက်တွေ ထုတ်ပြန်ခဲ့ပြီးတဲ့နောက် ယနေ့ ဇူလိုင်လ ၁၈ ရက် နေ့လယ်ပိုင်းမှာ ကန်ဒေါ် လာဈေးတွေ မြင့်တက်လာကြောင်း သိရသည်။
မြန်မာနိုင်ငံဗဟိုဘဏ်က ပြီးခဲ့သည့် ရက်ပိုင်းအတွင်းက နိုင်ငံခြားတွေနှင့် ပတ်သက်သည့် ကန့်သတ်ချက်အချို့ကို ထုတ်ပြန်ခဲ့ပြီး နိုင်ငံသား ၃၀ ရာခိုင်နှုန်းပိုင်ဆိုင်သည့် ပြည်ပရင်းနှီးမြှုပ်နှံမှု ကုမ္ပဏီများအနေဖြင့် ၎င်းတို့၏ ဘဏ်စာရင်းအတွင်းရှိ ဒေါ်လာများကို မြန်မာငွေသို့ မဖြစ်မနေပြောင်းရန် ညွှန်ကြားချက် ထုတ်ပြန်ထားခြင်း ဖြစ်သည်။
” မနက်စောစောမှာ (၂၂၄၀) ပတ်လည်လောက်ကနေ နေ့ လယ်ပိုင်းမှာ (၂၃၀၀) ကျော်အထိ တက်သွားတယ်” ဟု ရန်ကုန်မြို့မှ ငွေကြေးလုပ်ငန်းနှင့် ပြည်ပငွေသွင်းငွေထုတ် လုပ်ငန်း လုပ်ကိုင်သူ ကိုကျော်စွာက ပြောသည်။
ပြီးခဲ့သည့် ရက်ပိုင်းအတွင်း ဗဟိုဘဏ်၏ ညွှန်ကြားချက်များတွင် ယခင်က ကင်းလွတ်ခွင့်ပြုထားသည့် ပြည်ပရင်းနှီးမြှုပ်နှံမှု ကုမ္မဏီများ၏ ငွေစာရင်းအတွင်းမှ နိုင်ငံ ခြားငွေ များကို မြန်မာကျပ်ငွေသို့ ပြန်လဲရမည့် ကိစ္စကို ပြန်လည် ပယ်ဖျက်သည့် ညွှန်ကြားချက်လည်း ပါဝင်သည်။
ထို့အပြင် ပြည်ပသို့ ပေးရမည့် ကြွေးမြီများကိုလည်း ပေးချေခြင်း မပြုဘဲ ဆိုင်းငံ့ထားရန် စသည့် နိုင်ငံခြားငွေနှင့် ပတ်သက်သည့် ဗဟိုဘဏ်၏ ညွှန်ကြားချက်များကြောင့် ယခုလို ဒေါ်လာဈေးနှုန်း ဂယက်ထ လာခြင်း ဖြစ်ကြောင်း စီးပွားရေးကျွမ်းကျင်သူများက သုံးသပ်မှုများရှိသည်။
ဟုတ်ပါတယ်။ ဗဟိုဘဏ် ထုတ်ပြန်ချက်တွေရဲ့ နောက် ဆက်တွဲ ရိုက်ခတ်မှုပေါ့။ ဘယ်လောက်အထိ တက်ဦးမလဲ မခန့်မှန်း နိုင်ဘူး” ဟု ကိုကျော်စွာက ပြောသည်။
ပြင်ပဈေးကွက်တွင် ပြီးခဲ့သည့် ရက်ပိုင်းအတွင်းက (၁) ဒေါ် လာလျင် မြန်မာကျပ်ငွေ( ၂၁၅၀) ဝန်းကျင်ပေါက်ဈေး ရှိနေရာမှ ယနေ့ ညနေပိုင်းတွင်( ၂၃၅၀) အထိ မြင့်တက်လာကြောင်း ပြည်တွင်း ငွေလဲကောင်တာများနှင့် နှီးစပ်သူ သတင်းရင်းမြစ်က ပေါ်ပြူလာနယူးစ်သို့ ပြောသည်။
နိုင်ငံခြား ရင်းနှီးမြှုပ်နှံမှုများမှ ရရှိသည့် နိုင်ငံခြားငွေများကို မြန်မာကျပ်ငွေသို့ မဖြစ်မနေ လဲလှည်ရမည်ဟု ဗဟိုဘဏ်က ညွှန်ကြားထားပြီး ၁ ဒေါ်လာလျှင် မြန်မာကျပ်ငွေ (၁၈၅၀) အဖြစ် ရည်ညွှန်း သတ်မှတ်ထားသည်။
နယ်စပ်ကုန်သွယ်မှု လုပ်ဆောင်ရာတွင်လည်း ပဲ၊ ပြောင်းနှင့် ဆီထွက်သီးနှံများကို ကန်ဒေါ်လာဖြင့်သာ ငွေပေးချေရန်လည်း ဗဟိုဘဏ်က ထုတ်ပြန်ထားသည်။
