တောင်ကိုရီးယားနှင့်ပိုလန်တို့ ကန်ဒေါ်လာ ၅ ဒသမ ၈ ဘီလီယံတန်တင့်ကားနှင့်ဟောင်ဝစ်ဇာစာချုပ်လက်မှတ်ရေးထိုး

တောင်ကိုရီးယားနှင့်ပိုလန်တို့ ကန်ဒေါ်လာ ၅ ဒသမ ၈ ဘီလီယံတန်တင့်ကားနှင့်ဟောင်ဝစ်ဇာစာချုပ်လက်မှတ်ရေးထိုး

ဆိုလ်း၊ဩဂုတ် ၂၇

ရုရှားနှင့်တင်းမာမှုများကြားတွင် စစ်လက်နက်ပစ္စည်းများတင်သွင်းမှုအရှိန်မြှင့်တင်ရန် ဝါဆောကသဘောတူပြီးနောက် တောင်ကိုရီးယားကုမ္ပဏီနှစ်ခုသည် ပိုလန်သို့တင့်ကားများနှင့် ဟောင်ဝစ်ဇာများတင်ပို့ရန် ကန်ဒေါ်လာ ၅ ဒသမ ၇၆ ဘီလီယံတန်ဖိုးရှိ စာချုပ်ကိုလက်မှတ်ရေးထိုးခဲ့ကြောင်း ဆိုးလ်လက်နက်ဝယ်ယူရေးအေဂျင်စီက စနေနေ့ကပြောကြားခဲ့သည်။

ပိုလန်နိုင်ငံ၌ ဩဂုတ်လ ၂၆ ရက် သောကြာနေ့ကချုပ်ဆိုပြီးစီးခဲ့သော အဆိုပါစာချုပ်သည် အိမ်နီးချင်းယူကရိန်းသို့ရုရှားကျူးကျော်မှုကိုရင်ဆိုင်နေရချိန် ၎င်း၏စစ်အင်အားကိုဖြည့်တင်းရန်ကြိုးပမ်းနေသော ပိုလန်နှင့် ချုပ်ဆိုခဲ့သည့်တောင်ကိုရီးယား၏ အကြီးဆုံးသဘောတူညီချက်ပင်ဖြစ်သည်။

Hyundai Rotem ကုမ္ပဏီသည် K2 Black Panther တင့်ကားများကိုတင်ပို့မည်ဖြစ်ပြီး Hanwha Corp ၏ကာကွယ်ရေးယူနစ် Hanwha Defence မှ K9 မောင်းသူမဲ့ဟောင်ဝစ်ဇာများကို ပိုလန်သို့ပေးပို့မည်ဖြစ်ကြောင်း Defense Acquisition Program Administration (DAPA) မှပြောကြားခဲ့သည်။

စာချုပ်တစ်ခုလုံး၏တန်ဖိုးကို မကြေငြာသော်လည်း တောင်ကိုရီးယားမီဒီယာများက ဝမ် ၂၀ ထရီလီယံ (ကန်ဒေါ်လာ ၁၅ ဘီလီယံ) အထိခန့်မှန်းထားသည်။ “လက်နက်စနစ်များ မျှဝေခြင်းနှင့် ကာကွယ်ရေးတင်ပို့မှု၊ အပြန်အလှန်ထောက်ပံ့ပို့ဆောင်ရေးနှင့်လုံခြုံရေးမဟာမိတ်များ အားကောင်းလာစေရန်အရေးကြီးသဖြင့် ယခုပို့ကုန်သဘောတူညီချက်သည် ဉရောပနိုင်ငံများနှင့် စည်းလုံးညီညွတ်မှုတည်ဆောက်ပြီး လုံခြုံရေးစွမ်းရည်ချဲ့ထွင်ရန်ကြိုးပမ်းမှုအား အထောက်အကူဖြစ်စေရန်မျှော်လင့်ပါသည်” ဟု DAPA မှထုတ်ပြန်ချက်တွင်ဖော်ပြထားသည်။

မေလတွင်သမ္မတဖြစ်လာသော တောင်ကိုရီးယားသမ္မတ မစ္စတာယွန်းဆော့ယော် သည် မြောက်ကိုရီးယား၏ တိုးမြင့်လာသော နျူနှင့်စစ်ရေးခြိမ်းခြောက်မှုများကြားတွင် ဒီမိုကရေစီနှင့်ဈေးကွက်စီးပွားရေးတန်ဖိုးများကို မျှဝေသည့် ဉရောပနိုင်ငံများနှင့် လုံခြုံရေးပူးပေါင်းဆောင်ရွက်မှုကို အရှိန်မြှင့်တင်မည်ဟု ကတိပြုခဲ့သည်။

ပိုလန်သည်သဘောတူညီချက်အရ K2 တင့်ကားအစီးရေ ၁၈၀၊အရေအတွက်အတိအကျမပြောထားသော ဟောင်ဝစ်ဇာများနှင့် FA – 50 တိုက်လေယာဉ်၄၈ စင်းဝယ်ယူရန်သဘောတူညီခဲ့သည်။သောကြာနေ့ကချုပ်ဆိုခဲ့သောစာချုပ်အတွက် ပထမတစ်ရစ်တင်သွင်းမည်ဖြစ်ပြီး ဂျက်လေယာဉ်များအတွက်သဘောတူညီချက်ကိုလာမည့်လတွင်ပြုလုပ်နိုင်ရန်မျှော်လင့်ထားသည်။

ရုရှားကအထူးစစ်ရေးစစ်ဆင်မှုဟု အမည်ပေးထားသော ယူကရိန်းကျူးကျော်မှုသည် အရှေ့အုပ်စုနိုင်ငံများကြားတွင် စိုးရိမ်မှုများတိုးလာစေခဲ့သည်။နေတိုးအဖွဲ့ဝင်ပိုလန်နိုင်ငံသည် ၎င်း၏စစ်အသုံးစရိတ်ကို နိုင်ငံ့ GDP ၏ ၃ ရာခိုင်နှုန်းအထိတိုးမြှင့်သုံးစွဲမည်ဖြစ်ကာ ကျူးကျော်တိုက်ခိုက်မှုများကို ဟန့်တားရန်အတွက် စစ်အင်အားကိုနှစ်ဆကျော်တိုးမြှင့်သွားမည်ဟု ကတိပြုခဲ့သည်။

Source – Reuters/gs