ပါကစ္စတန်က ၎င်း၏ လေပိုင်နက်အား အမေရိကန်ဒရုန်းများကို သုံးခွင့်ပေးထားသည်ဟု တာလီဘန် စွပ်စွဲ
ကဘူးလ်၊ သြဂုတ် ၂၈
ပါကစ္စတန်သည် အမေရိကန်ဒရုန်းများ အား အာဖဂန်နစ္စတန်အတွင်းသို့ ဝင်ရောက်နိုင်ရန် ၎င်း၏လေပိုင်နက်ကို အသုံးပြုခွင့်ပေးခဲ့ကြောင်း တာလီဘန် ခေတ်တ ကာကွယ်ရေးဝန်ကြီးက ဩဂုတ်လ ၂၈ ရက် တနင်္ဂနွေနေ့တွင်ပြောကြားခဲ့သည်။
ပြီးခဲ့သည့် ဇူလိုင်လတွင် အယ်လ်ကိုင်ဒါခေါင်းဆောင် အိုင်မန် ဇာဝါဟီရီ ကို ဒုံးကျည်တပ် ဒရုန်းတစ်စီးလွှတ်ကာ လုပ်ကြံသတ်ဖြတ်နိုင်ခဲ့ကြောင်း အမေရိက က ကြေညာခဲ့သည်။ ပါကစ္စတန်အာဏာပိုင်များက အဆိုပါ ဒရုန်းတိုက်ခိုက်မှု၌ ပါဝင်ပတ်သက်ခြင်း သို့မဟုတ် ဖြစ်ပွားမည်ကို ကြိုတင်သိနေခဲ့ခြင်း မရှိဟု ငြင်းဆိုထားသည်။
အာဖဂန်နစ္စတန် ခေတ်တကာကွယ်ရေးဝန်ကြီး မိုဟာမတ်က ယာကု့ဘ် က အမေရိကန်ဒရုန်းများသည် ပါကစ္စတန်မှတစ်ဆင့် အာဖဂန်နစ္စတန်အတွင်းသို့ ဝင်ရောက်လာကြောင်း ကဘူးလ်၌ပြုလုပ်ခဲ့သော သတင်းစာရှင်းလင်းပွဲတွင် ပြောကြားခဲ့သည်။
“ကျွန်တော်တို့မှာရှိတဲ့ သတင်းအချက်အလက်တွေအရဆိုရင် အမေရိကန်ဒရုန်းတွေဟာ ပါကစ္စတန်ကိုဖြတ်ပြီး အာဖဂန်နစ္စတန်ကို ဝင်လာတာပါ၊ သူတို့ဟာ ပါကစ္စတန်ရဲ့ လေပိုင်နက်ကို အသုံးပြုနေတာပါ၊ ဒါကြောင့် ပါကစ္စတန်ကို ကျွန်တော်တို့ကို တိုက်ခိုက်ဖို့အတွက် ခင်ဗျားတို့ရဲ့ လေပိုင်နက်ကို အသုံးပြုခွင့်မေပးဖို တောင်းဆိုပါတယ်” က ၎င်းက ပြောကြားခဲ့သည်။
အမေရိကန် ဗဟိုထောက်လှမ်းရေးအေဂျင်စီ၏ ပြောရေးဆိုခွင့်ရှိသူက အထက်ပါကိစ္စနှင့် ပတ်သက်၍ မှတ်ချက်ပေးရန် ငြင်းဆိုခဲ့သည်။
ပါကစ္စတန်နိုင်ငံခြားရေးဝန်ကြီး ဘီလာဝဲလ် ဘူတို-ဇာဒါရီ က ၎င်းသည် အဆိုပါ လေကြောင်းတိုက်ခိုက်မှုအပြီးတွင် စစ်ဆေးမှုများ ပြုလုပ်ခဲ့ကြောင်းနှင့် ပါကစ္စတန်လေပိုင်နက်မှာ အသုံးပြုခံထားရခြင်း မရှိကြောင်း ရိုက်တာသတင်းဌာနကို ပြောကြားခဲ့သည်။
တနင်္ဂနွေနေ့ စွပ်စွဲမှုများအပြီး ထပ်မံစစ်ဆေးသွားမည်ဖြစ်သော်လည်း ရလဒ်မှာ ပြောင်းလဲသွားမည်မဟုတ်ဟု ၎င်းက ဆိုသည်။
တာလီဘန်သည် ဇာဝါဟီရီအား ၎င်းတို့ပိုင်နက်အတွင်း ခိုလှုံနေထိုင်ခွင့်ပြုထားခြင်းအားဖြင့် အာဖဂန်နစ္စတန်မှ အမေရိကန်ဦးဆောင်သော တပ်ဖွဲ့များ ဆုတ်ခွာရေး ၂၀၂၀ ပြည့်နှစ် သဘောတူညီချက်ကို ပြင်းပြင်းထန်ထန် ချိုးဖောက်ခဲ့ကြောင်း အမေရိကန် နိုင်ငံခြားရေးဝန်ကြီး အန်တိုနီ ဘလင်ကန်က ပြောကြားခဲ့သည်။
တာလီဘန်က ဇူလိုင်လတွင် ဖြစ်ပွားခဲ့သော ဒရုန်းလွှတ် လုပ်ကြံမှုအား စုံစမ်းလျက်ရှိပြီး အယ်လ်ကိုင်ခေါင်းဆောင်၏ ရုပ်အလောင်းကိုလည်း ယခုအချိန်အထိ ရှာမတွေ့သေးကြောင်း ပြောကြားခဲ့သည်။
Source: ရိုက်တာ
