ဂျပန်သည် တရုတ်နှင့် ရုရှားရန်ကို တန်ပြန်ရန်အတွက် တာဝေးပစ် ဒုံးကျည်များ ထုတ်လုပ်ရန် စီစဉ်လာ
ဂျပန်နိုင်ငံသည် တရုတ်နှင့် ရုရှားတို့၏ ခြိမ်းခြောက်မှုများကို ရင်ဆိုင်နိုင်ရန် ရည်ရွယ်သည့် စစ်ရေးတိုးချဲ့မှု တစ်စိတ်တစ်ပိုင်းအနေဖြင့် ခရုဇ်ဒုံးကျည်များနှင့် မြန်နှုန်းမြင့် ပဲ့ထိန်းစနစ် ဒုံးကျည်များကို အမြောက်အမြား ထုတ်လုပ်သွားမည်ဟု ဩဂုတ်လ ၃၁ ရက် ဗုဒ္ဓဟူးနေ့တွင် ပြောကြားခဲ့သည်။
အဆိုပါ ဒုံးကျည် ဝယ်ယူထုတ်လုပ်ရေး အစီအစဉ်ကို ကာကွယ်ရေး ဝန်ကြီးဌာန၏ နှစ်စဉ်ဘတ်ဂျက်တောင်းခံမှုတွင် ထုတ်ဖော်ပြသခဲ့ခြင်း ဖြစ်သည်။
ဂျပန်နိုင်ငံ၏ ဖွဲ့စည်းပုံအခြေခံဥပဒေအရ ၎င်း၏ ကိုယ်ပိုင်ကာကွယ်ရေး တပ်ဖွဲ့များသည် အကွာအဝေးအားဖြင့် ကီလိုမီတာ ရာဂဏန်းသာရှိသော ဒုံးကျည်များကိုသာ လက်ဝယ်ထားရှိ၍ ပစ်လွှတ်နိုင်သည်။
ထို့ကြောင့် ယင်းကဲ့သို့ တာဝေးပစ်ဒုံးကျည်များ ထုတ်လုပ်ရန်အတွက် ဘတ်ဂျက်တောင်းခံလိုက်ခြင်းမှာ ဂျပန်သည် တာဝေးပစ်ဒုံးကျည်များနှင့် ပတ်သက်၍ ဆယ်စုနှစ်များစွာ ကန့်သတ်ထားသော အဆိုပါ စည်းမျဉ်းဥပဒေမှ သိသိသာသာ စွန့်ခွာလာသည်ကို ပြသနေသည်။
“တရုတ်နိုင်ငံဟာ ပစိဖိတ်ဒေသတွင်း လက်ရှိအနေအထားကို တစ်ဖက်သက် ပြောင်းလဲဖို့အတွက် အင်အားသုံးကာ ဆက်လက်ခြိမ်းခြောက်နေပြီး ရုရှားနဲ့လည်း မဟာမိတ်ဆက်ဆံရေး ပိုမိုအားကောင်းလာအောင် လုပ်ဆောင်နေပါတယ်” ဟု ဝန်ကြီးဌာနက ၎င်း၏ ဘတ်ဂျက်တောင်းခံမှုတွင် ပြောကြားခဲ့သည်။
အဆိုပါ ဘတ်ဂျက်တောင်းခံမှုမှာ သင်္ဘောများကို တိုက်ခိုက်နိုင်ရန်အတွက် မြေပြင်ပစ် ခရုဇ်ဒုံးကျည်များ အမြောက်အမြား ထုတ်လုပ်ရန်နှင့် မြေပြင်ပစ်မှတ်များကို ပစ်ခတ်နိုင်သော မြန်နှုန်းမြင့် ပဲ့ထိန်းဒုံးကျည်သစ်များ ထုတ်လုပ်ရန်အတွက် ရန်ပုံငွေ တောင်းခံခြင်း ဖြစ်ကြောင်း သိရသည်။
တရုတ်နိုင်ငံသည် ထိုင်ဝမ်ကျွန်းတစ်ဝိုက် စစ်ရေးလေ့ကျင်မှုများ ပြုလုပ်ကာ ဖိအားများ ပေးလျက်ရှိပြီး ထိုင်ဝမ်ကို ကျန်ရှိသော တရုတ်ဒေသများနှင့် ပေါင်းစည်းနိုင်ရန်အတွက် ၎င်း၏စစ်အင်အား အသုံးပြုမှုကို စွန့်လွှတ်လိမ့်မည်မဟုတ်ကြောင်း ၎င်းကဆိုသည်။
နန်စီပလိုစီ၏ ထိုင်ဝမ်ခရီးစဉ်အပြီး တရုတ်၏ စစ်ရေးလေ့ကျင့်မှုတွင် ပစ်လွှတ်ခဲ့သော ပဲ့ထိန်းဒုံးကျည်များအနက် ငါးစင်းမှာ ဂျပန်၏ သီးသန့်စီးပွားရေးဇုန်သို့ ကျရောက်ခဲ့ပြီးနောက် တရုတ်၏ ဒေသတွင်း ရည်မှန်းချက်များနှင့် ပတ်သက်၍ ဂျပန်နိုင်ငံတွင် သတိပေးမှုများ မြင့်တက်လာခဲ့ခြင်း ဖြစ်သည်။
ဝန်ကြီးဌာနသည် မြောက်ကိုရီးယားအား ဂျပန်အပေါ် ခြိမ်းခြောက်မှုတစ်ခုအဖြစ် ရှိနေကြာင်းကိုလည်း ဖော်ပြခဲ့သည်။
Source: စီအင်န်အေ
