ယူကရိန်းအားထောက်ခံသည်ဟုဆိုကာ အမေရိကန်သရုပ်ဆောင်နှစ်ဦးအား ရုရှားပိတ်ဆို့ဒဏ်ခတ်
လန်ဒန်၊စက်တင်ဘာ ၅
ရုရှားနိုင်ငံမှ ဟောလိဝုဒ်မင်းသား ဘန်စတယ်လာနှင့် ရှောင်န်ပန်န်တို့အား မော်စကို ယူကရိန်းစစ်ပွဲအပေါ်ဝေဖန်သည့်အတွက် စက်တင်ဘာလ ၅ ရက် တနင်္လာနေ့က ပိတ်ဆို့အရေးယူမှုများချမှတ်ကာ တုံ့ပြန်ခဲ့သည်။
ရုရှားနိုင်ငံခြားရေးဝန်ကြီးဌာနသည် ရုရှားနိုင်ငံအတွင်းသို့ဝင်ရောက်ခွင့်ပိတ်ပင်ထားသည့် အမေရိကန်နိုင်ငံသား ၂၅ ဦးတွင် အများစုမှာ နိုင်ငံရေးသမားများ၊ကုန်သွယ်ရေးအရာရှိများနှင့် စီးပွား ရေးလုပ်ငန်းများမှအမှုဆောင်အရာရှိများအပြင် သရုပ်ဆောင်များပါပါဝင်ခဲ့သည်။
စတယ်လာနှင့်ရှောင်န်ပန်န်တို့သည် ပဋိပက္ခတွင် ယူကရိန်းကိုထောက်ခံသူများဖြစ်ကြပြီး ယူကရိန်းသမ္မတ ဗလာဒီမာဇလန်းစကီးနှင့် ပြပွဲများ၌တွေ့ရှိခဲ့သူများဖြစ်ကြသည်။ဇွန်လက ကိဗ်၌ပြုလုပ်ခဲ့သည့် ရုပ်မြင်သံကြားအစီအစဉ်တစ်ခုတွင် စတယ်လာက ဇလန်းစကီးအား ကျွန်တော့်ရဲ့သူရဲကောင်းပါဟု ချီးကျူးဂုဏ်ပြုခဲ့သည်။
အော်စကာနှစ်ထပ်ကွမ်းဆုရှင် ရှောင်န်ပန်န်ကလည်း ယူကရိန်းသို့ရုရှားဝင်ရောက်သည့် ၂၀၂၁ ခုနှစ်ဖေဖော်ဝါရီလ ၂၄ ရက်နေ့က မော်ကွန်းရုပ်ရှင်ရိုက်ကူးရန်ယူကရိန်းတွင် ရှိနေပြီးစစ်ပွဲစဖြစ်ကတည်းက ပိုလန်သို့ထွက်ပြေးကြသည့် သန်းပေါင်းများစွာသော ယူကရိန်းနိုင်ငံသားများနှင့်အတူ ခြေလျင်ထွက်ပြေးခဲ့ရသည်။
၎င်းသည်လည်း ဇလန်းစကီးအားထောက်ခံအားပေးသူတစ်ဦးဖြစ်ပြီး ဇွန်လကလည်းဇလန်းစကီးနှင့်တွေ့ဆုံရန် ယူကရိန်းသို့ပြန်လာခဲ့သည်။ဇလန်းစကီးကလည်း ၎င်းအားယခုလိုထောက်ခံအားပေးမှုအတွက် ကျေးဇူးတင်ကြောင်းအကျယ်တဝင့်ပြောကြားခဲ့သည်။
ယခုပိတ်ဆို့မှုတွင်ပါရှိသည့်သူများအနေဖြင့် ရုရှားနိုင်ငံသားများနှင့် စီးပွားရေးလုပ်ကိုင်ခြင်းကိုတားမြစ်ထားခြင်းခံရကာ ရုရှားသို့ဝင်ရောက်ခွင့်ကိုလည်း တားမြစ်ပိတ်ပင်ခြင်းခံထားရသည်။အဆိုပါပိတ်ဆို့ဒဏ်ခတ်ခံရသူစာရင်းတွင် ကန်ကူးသန်းရောင်းဝယ်ရေးဝန်ကြီး Gina Raimondo ၊ လက်ထောက်ကူးသန်းရောင်းဝယ်ရေးဝန်ကြီးလေးဦးနှင့် ကန်အထက်လွှတ်တော်အမတ်ခြောက်ဦးတို့ပါဝင်သည်။
ယူကရိန်းသို့ကျူးကျော်မှုအား တုံ့ပြန်သည့်အနေဖြင့် အနောက်အုပ်စုကလည်း ရုရှားအပေါ်စီးပွားရေးနှင့် ပုဂ္ဂိုလ်ရေးဆိုင်ရာ ပိတ်ဆို့အရေးယူမှုများချမှတ်ခဲ့သည်။မော်စကိုကလည်း နိုင်ငံရေးသမားများ၊စီးပွားရေးခေါင်းဆောင်များနှင့် ရုရှားအပေါ်ရန်လိုသည်ဟု ထင်ရသည့်ပုဂ္ဂိုလ်များကိုလည်း ပြန်လည်ဒဏ်ခတ်ပိတ်ဆို့ခြင်းဖြင့် တုံ့ပြန်ခဲ့သည်။
Source –Reuters/ng
