ရုရှားအားလက်နက်ခဲယမ်းများမပေးခဲ့ဖူးဟု မြောက်ကိုရီးယားပြောကြား
ဆိုးလ်၊စက်တင်ဘာ ၂၂
ရုရှားနိုင်ငံသို့ လက်နက်ခဲယမ်းများပေးသွင်းဖူးခြင်းမရှိကြောင်း မြောက်ကိုရီးယားက စက်တင်ဘာ ၂၂ ရက် ကြာသပတေးနေ့ကပြောကြားခဲ့ပြီး နိုင်ငံ၏ဂုဏ်သိက္ခာကို ညှိုးနွမ်းစေမည့်ကောလဟလများ ဖြန့်ဝေခြင်းအားရပ်တန်းကရပ်ရန် အမေရိကန်ပြည်ထောင်စုအား သတိပေးပြောကြားခဲ့သည်။
“မြောက်ကိုရီးယားအပေါ်ရန်လိုနေတဲ့ အမေရိကန်နဲ့သူ့ရဲ့မဟာမိတ်တွေက မြောက်ကိုရီးယားနဲ့ရုရှားအကြား လက်နက်ကူးသန်းရောင်းဝယ်မှုတွေလုပ်ပြီးကုလ လုံခြုံရေးကောင်စီ ရဲ့ဆုံးဖြတ်ချက်ကို ချိုးဖောက်တယ်လို့ပြောနေကြတာတွေကြားခဲ့ရပါတယ်၊တကယ်တမ်းကျ မြောက်ကိုရီးယားအနေနဲ့ရုရှားကိုဘယ်တုန်းကမှလက်နက်ခဲယမ်းတင်ပို့တာမျိုးမရှိခဲ့သလို တင်ပို့ဖို့လည်းအစီအစဉ်မရှိပါဘူး” ဟု နိုင်ငံတော်ကာကွယ်ရေးဝန်ကြီးဌာန စက်လက်နက်ပစ်စည်း ဗျူရိုဒုတိယညွှန်ကြားရေးမှူးချုပ်တစ်ဦး၏ အမည်မဖော်ပြလိုသောပြောကြားချက်ကိုကိုးကားလျက် KCNA ကဖော်ပြခဲ့သည်။
အမေရိကန်နိုင်ငံခြားရေးဌာနလက်ထောက်ပြောရေးဆိုခွင့်ရှိသူ Vedant Patel ကမူ ရုရှားသည် ယူကရိန်း၌အသုံးပြုရန်အတွက် မြောက်ကိုရီးယားထံမှ သန်းနှင့်ချီသောဒုံးကျည်များနှင့် အမြောက်ကျည်ဆန်များကို ဝယ်ယူရန်လုပ်ဆောင်နေသည်ဟု ယခုလအစောပိုင်းကပြောကြားခဲ့သည်။
သို့သော် အိမ်ဖြူတော်အမျိုးသားလုံခြုံရေးပြောရေးဆိုခွင့်ရှိသူ John Kirby ကမူ အဆိုပါဝယ်ယူမှုသည် ပြီးမြောက်ခြင်းမရှိကြောင်းနှင့် အဆိုပါလက်နက်အမျိုးအစားများကိုလည်း ယူကရိန်း၌အသုံးပြုမှုကိုလုံးဝမတွေ့ရှိခဲ့ကြောင်းကို နောက်ပိုင်းတွင်ပြန်လည်ရှင်းလင်းပြောကြားခဲ့သည်။
ထို့ပြင် အမေရိကသည် အီရန်ကိုလည်း ယူကရိန်းစစ်၌အသုံးပြုရန် ရုရှားသို့ဒရုန်းများေပးသွင်း သည်ဟု ပြောခဲ့သော်လည်း အီရန်ကတော့ငြင်းဆိုထားသည်။ရုရှားကလည်း အဆိုပါစွပ်စွဲချက်များအားလုံးကိုပယ်ချထားပြီး အမှန်တကယ်ဖြစ်ကြောင်းအထောက်အထားနှင့်တကွသက်သေပြပါဟု အမေရိကသို့တောင်းဆိုထားသည်။ရုရှားနှင့်မြောက်ကိုရီးယားတို့သည် ၎င်းတို့၏ဆက်ဆံရေးကိုမကြာသေးမီကဆွေးနွေးခဲ့ကြသည်။
ရုရှားသမ္မတဗလာဒီမာပူတင်က မြောက်ကိုရီးယားလွတ်လပ်ရေးနေ့အတွက်စာပေးပို့ခဲ့စဉ်က ကင်မ်ဂျုံအမ်းအား နှစ်နိုင်ငံ၏ကြိုးပမ်းမှုများဖြင့်နှစ်နိုင်ငံဆက်ဆံရေးကို ပိုမိုချဲ့ထွင်သွားရန်ပြောကြားခဲ့ပြီး မြောက်ကိုရီးယားခေါင်းဆောင် ကင်မ်ဂျုံအမ်းကလည်း နှစ်နိုင်ငံအကြားမဟာဗျူဟာနှင့်နည်းဗျူဟာ ပူးပေါင်းဆောင်ရွက်မှု၊ပံ့ပိုးမှုနှင့်စည်းလုံးညီညွတ်မှုတို့သည် ရန်လိုနေသောအခြားစစ်အင်အားစုများကြားမှပင် ခြိမ်းခြောက်မှုများနှင့်ရန်စမှုများကိုလျော့ပါးစေနိုင်သည့် အဆင့်သို့ရောက်ရှိနေပြီဖြစ်ကြောင်းရေးသားထားသည့်စာဖြင့် သမ္မတပူတင်ထံသို့ပြန်စာပေးပို့ခဲ့သည်။
ရုရှားကအထူးစစ်ဆင် ရေးဟုအမည်တပ်ထားသည့် ထိုးစစ်ဆင်မှုကိုခုခံနေသောယူကရိန်းသည် ရုရှားကျောထောက်နောက်ခံပြုထားသော ခွဲထွက်ရေးလိုလားသည့်ယူကရိန်းအရှေ့ပိုင်းရှိနေရာနှစ်ခုအား ဇူလိုင်လအတွင်း၌ ပြုံယမ်းက လွတ်လပ်သောပြည်နယ်များအဖြစ်အသိအမှတ်ပြုပေးခဲ့ပြီးနောက် ပြုံယမ်းနှင့်ဆက်ဆံရေးကိုဖြတ်တောက်ခဲ့သည်။
Source –Reuters/ec
