ရန်ကုန်တိုင်း၊အင်းစိန်မြို့နယ်ရှိ နှစ်ပေါင်း ၁၀၀ ကျော်ကတည်ဆောက်ခဲ့သည့် မြန်မာ့မီးရထားစက်ခေါင်းစက်ရုံ(အင်းစိန်)ရှိ ဝန်ထမ်းများအား နစက ဥက္ကဋ္ဌ၊ ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်က ဒီဇင်ဘာ ၂၁ ရက်နံနက်ပိုင်း၌ တွေ့ဆုံစဥ် ပြောကြားခဲ့ခြင်းဖြစ်သည်။
စီးပွားရေးဖွံ့ဖြိုးတိုးတက်ရန် ဆောင်ရွက်ရာ၌ လူ သားအရင်းအမြစ်ကြွယ်ဝရန်၊ရင်းနှီးမြှုပ်နှံငွေများရှိရန်၊မြေပေါ်မြေအောက်သယံဇာတများရှိရန်၊လျှပ်စစ်ဓာတ်အားရရှိရန်နှင့်သယ်ယူပို့ဆောင်ရေးနှင့်ဆက်သွယ်ရေးစနစ်များ ကောင်းမွန်မှုရှိရန် လိုအပ်သည်ဟု ဆိုသည်။
နိုင်ငံအတွင်း လမ်းပန်းဆက်သွယ်ရေးများကောင်းမွန်ပါက ကုန်စည်စီးဆင်းမှုများမြန်ဆန်လျှင်မြန်လာမည်ဖြစ်ကာ နိုင်ငံဖွံ့ဖြိုးတိုးတက်ရေးကို များစွာအထောက်အကူဖြစ်စေနိုင်မည်ဟု ဆို သည်။
“သယ်ယူပို့ဆောင်ရေးစနစ်မှာ ကုန်လမ်း၊ရေလမ်းနဲ့လေကြောင်းပို့ဆောင်ရေးတွေထဲက ရထားနဲ့ပို့ ဆောင်ခြင်းဟာ ကုန်ကျစရိတ်သက်သာစွာနဲ့ ကုန် ပစ္စည်းတွေကို ပို့ဆောင်နိုင်တာကြောင့် အကျိုးအရှိဆုံးပို့ဆောင်ရေးစနစ်ဖြစ်ပါတယ်၊ ဒါ့ကြောင့် နိုင်ငံရဲ့စီးပွားရေးမောင်းနှင်အားမှာ ရထားပို့ ဆောင်ရေးဟာ အရေးကြီးတဲ့ အခန်းကဏ္ဍကပါ ဝင်တာကို တွေ့ရှိရမှာဖြစ်ပါတယ်”ဟု နစက ဥက္ကဋ္ဌကပြောသည်။
ရထားပို့ဆောင်ရေးစနစ်အား ယခုထက် ပိုမိုလျှင်မြန်စွာသွားလာနိုင်သည့် အဆင့်ထိရောက်ရှိရန် ကြိုးပမ်းဆောင်ရွက်လျက်ရှိကာ ရထားလမ်းများ အဆင့်မြှင့်တင်ခြင်းနှင့်ပြုပြင်ထိန်းသိမ်းခြင်းများကို စဉ်ဆက်မပြတ်ဆောင်ရွက်ရန်လိုပြီး ရထားတွဲ များ၊စက်ခေါင်းတွဲများ၊လူစီးတွဲကုန်တင်တွဲများကိုလည်း အမြဲကောင်းမွန်စေရန် ထိန်းသိမ်းဆောင်ရွက်ရမည်ဟု မှာကြားခဲ့သည်။
မြန်မာ့မီးရထားသည် တိုင်းပြည်ဖွံ့ဖြိုးတိုးတက်ရေးအတွက်အဓိကကျသည့် အဖွဲ့အစည်းတစ်ခုဖြစ်၍ မီးရထားဝန်ထမ်းများ၏ တာဝန်ထမ်းဆောင်မှုသည် အရေးပါသဖြင့် ကုန်စည်စီးဆင်းမှုများလျှင်မြန်စေရေး၊ပြည်သူများ ဈေးနှုန်းသက်သာစွာ သွားလာနိုင်ရေးအတွက် ရထားလမ်း ကွန်ရက်များအားလုံး ရထားပြေးဆွဲနိုင်ရန် ဆောင်ရွက်ပေးရမည်ဟု မှာကြားသည်။
ထို့ပြင် စက်ခေါင်းတွဲများကြံ့ခိုင်ကောင်းမွန်မှသာ မြန်မာ့မီးရထားကဏ္ဍ ဖွံ့ဖြိုးတိုးတက်လာမည်ဖြစ်ပြီး လက်ရှိအချိန်တွင် ကမ္ဘာ့နိုင်ငံအသီးသီး၌ စက်သုံးဆီဈေးနှုန်းမြင့်တက်မှုများ ကြုံတွေ့နေရ၍ စက်သုံးဆီတင်သွင်းနေရမှုများကို လျှော့ချနိုင်ရန် သယ်ယူပို့ဆောင်ရေးလုပ်ငန်းများ၌ လျှပ်စစ်စွမ်း အင်သုံး ပို့ဆောင်ရေးယာဉ်များကို ပြောင်းလဲအ သုံးပြုနိုင်ရေးကို ဆောင်ရွက်ရန်လိုသည်ဟု မှာကြားသည်။
“မိမိတို့နိုင်ငံမှာ လျှပ်စစ်ရထားပြေးဆွဲနိုင်မယ့် အခွင့်အလမ်းတွေ များစွာရှိပြီးဖြစ်ပါတယ် သို့သော် နိုင်ငံတွင်းမှာရှိတဲ့ သယံဇာတရင်းမြစ်တွေက လျှပ်စစ်ဓာတ်အားထုတ်ယူနိုင်မယ့် အခြေအနေတွေဟာ အကြောင်းအမျိုးမျိုးကြောင့် အောင်မြင်မှုမရှိခဲ့ပါဘူး”ဟု နစက ဥက္ကဋ္ဌကပြောသည်။
လက်ရှိအချိန်၌ လျှပ်စစ်ဓာတ်အားလုံလောက်စွာ ထုတ်လုပ်သုံးစွဲနိုင်ရေး ကြိုးပမ်းဆောင်ရွက်လျက်ရှိ၍ လျှပ်စစ်ဓာတ်အားသုံးရထားစက်ခေါင်းတွဲများအသုံးပြုနိုင်ရန် ကြိုတင်ပြင်ဆင်မှုများကို ဆောင်ရွက်ထားရန်လိုသည်ဟု မှာကြားခဲ့သည်။
စက်ခေါင်းစက်ရုံ(အင်းစိန်)အနေဖြင့် ရှေးက တည်းကပင် မီးရထားစက်ခေါင်းများ ထုတ်လုပ်နိုင်ခဲ့ပြီး မြန်မာနိုင်ငံတွင် ရထားများကိုစတင်အ သုံးပြုခဲ့သည်မှာ နှစ်ပေါင်း ၁၅၀ ခန့် ကြာမြင့်ခဲ့ပြီဖြစ်၍ အတွေ့အကြုံများစွာရှိပြီးဖြစ်ကာ ယင်း အ တွေ့အကြုံများကိုအသုံးချ၍ နိုင်ငံအတွင်း မီးရ ထားစက်ခေါင်းများကို ထုတ်လုပ်နိုင်ရန်လိုသည်ဟု မှာကြားသည်။
“အဲဒီကတဆင့် လျှပ်စစ်ဓာတ်အားအသုံးပြုတဲ့ မီးရထားစက်ခေါင်းတွေကို ထုတ်လုပ်နိုင်ဖို့လိုပါတယ်၊ မိမိတို့မှာရှိပြီးဖြစ်တဲ့ အစွမ်းအစတွေကို အသုံးပြုပြီး မီးရထားစက်ခေါင်းနည်းပညာတွေ အခုထက်တိုးတက်အောင် ကြိုးပမ်းဆောင်ရွက်ကြစေလိုပါတယ်”ဟု နစက ဥက္ကဋ္ဌကမှာကြားခဲ့သည်။
