ကရင်ပြည်နယ်ရှိ မြဝတီ-ကော့ရိတ်သွားအာရှလမ်းမကြီးအား တိုက်ပွဲဖြစ်ပွားနေမှုကြောင့် ဖြတ် သန်းသွားလာခွင့်ပိတ်ထားဆဲဖြစ်ရာ မြဝတီမြို့အ ခြေစိုက်လူမှုကူညီရေးအသင်းများအနေဖြင့် နယ်ဝေးလူနာပို့ဆောင်ရန်အခက်အခဲများဖြစ်ပေါ်နေကြောင်း သိရသည်။
အာရှလမ်းမကြီးအား ပိတ်ထားဆဲဖြစ်၍ မဖြစ်မနေသွားလာရမည့်သူများသည် ထော့ကော်ကိုးလမ်းကိုသာ အားပြုသွားလာနေရသည်ဟု မြဝတီမြို့အခြေစိုက် လူမှုကူညီရေးအသင်းများမှ သိရသည်။
ယင်း ထော့ကော်ကိုးလမ်းသည် လမ်းညီညာမှုမရှိသည့်အပြင် မြေသားလမ်းဖြစ်၍ ကားကြီးများနှင့်အောက်ပိုင်းမြင့်သည့်ကားများသာသွားလာနိုင်ပြီး ဖြတ်သန်းချိန်တစ်လျှောက်လုံး၌ ဖုန်များစွာရှိသဖြင့် သွားလာမှုအဆင်မပြေကြောင်း သိရသည်။
“အခုဆိုရင် ကျွန်တော်တို့က နယ်ဝေးပို့ရမယ့်လူနာတွေရှိတယ် အာရှလမ်းကလည်းပိတ်ထားတယ် ထော့ကော်ကိုးလမ်းကလည်းမကောင်းတော့ ဘယ်လိုမှမပို့ပေးနိုင်ဘူး မြန်မာပြည်ပြန်ဝင်လာတဲ့လူတွေထဲက ကျန်းမာရေးမကောင်းတဲ့လူတွေဆိုရင်လည်း မြဝတီဆေးရုံမှာပဲထားတယ် တစ်ချို့ဆိုရင် ဆေးရုံမှာသေဆုံးသွားတာတွေရှိတယ်”ဟု မြဝတီမြို့အခြေစိုက်လူမှုကူညီရေးအသင်းဝင်တစ်ဦးကပြောသည်။
လက်ရှိအချိန်၌ တိုက်ပွဲဖြစ်ပွားမှုများကြောင့် ဖြတ်သန်းသွားလာခွင့်ပိတ်ထားသည့် အာရှလမ်းမကြီးအား ပြန်လည်ဖြတ်သန်းခွင့်ပြုနိုင်ရန် လုံခြုံရေးအဖွဲ့ဝင်များက ဆောင်ရွက်လျက်ရှိကာ မိုင်းခွဲဖျက်ဆီးခံထားရသည့် တောနော်ရေတံခွန်အနီးရှိ ချောင်းကူးတံတားကိုလည်း ပြန်လည်ပြင်ဆင်လျက်ရှိကြောင်း သိရသည်။
“အာရှလမ်းမကြီးကိုလုံခြုံရေးအာမခံချက်ရှိမှပြန်ပြီးဖြတ်သန်းခိုင်းမယ်လို့ကြားတယ် ကြာအုံးမယ်လို့လည်းကြားတယ် အဲဒီအတောအတွင်းမှာ ထော့ကော်ကိုးလမ်းကနေပဲသွားရမှာပေါ့ ကျွန် တော်တို့လူမှုကူညီရေးအသင်းကားတွေကတော့ ထော့ကော်ကိုးလမ်းကနေဘယ်လိုမှသွားလို့မရတဲ့အတွက် တစ်စီးမှမဆင်းနိုင်ဘူး”ဟု လူမှုကူညီရေးအသင်းဝင်တစ်ဦးကပြောသည်။
လက်ရှိအချိန်၌ အာရှလမ်းမကြီးအား မြဝတီမြို့သို့သွားမည့်ကားများအား တံတားကျိုးစစ်ဆေးရေးဂိတ်နှင့်မြဝတီမြို့ဘက်မှ ကော့ကရိတ်မြို့ဘက်သို့သွားမည့်ကားများအား သင်္ဃန်းညီနောင်ရှိ အာရှလမ်းသစ်လမ်းဆုံတို့မှစ၍ ဖြတ်သန်းခွင့်ပိတ်ထားသဖြင့် စောင့်ဆိုင်းနေရသည့် ကုန်တင်ကားများ၊ခရီးသည်တင်ကားများနှင့်ကိုယ်ပိုင် ကားများရာချီရှိနေကာ ရောက်ရှိသည့်နေရာ၌ရပ်တန့်၍ ဖြတ်သန်းခွင့်ရမည့်အချိန်အား စောင့်ဆိုင်းလျက်ရှိကြောင်း သိရသည်။
ပုံစာ-ထော့ကော်ကိုးလမ်းတွင် ဖြတ်သန်းသွားလာနေကြသည့် ကားများအားတွေ့ရစဥ်။
Photo-ဘီဝမ်း
