နယူးယောက်မြို့၏ နှစ်သစ်ကူးကြိုဆိုပွဲ အခမ်းအနားကျင်းပသည့်နေရာနှင့် မလှမ်းမကမ်းတွင် တောခုတ်ဓားကိုင်ဆောင်ထားသည့် အမျိုးသားတစ်ဦးက နယူးယောက်ရဲတပ်ဖွဲ့(NYPD)မှ တပ်ဖွဲ့ဝင်များအား တိုက်ခိုက်ခဲ့သဖြင့် ရဲအရာရှိ ၃ဦး ဒဏ်ရာရရှိခဲ့ကြောင်း NYPD က တနင်္ဂနွေနေ့အစောပိုင်းတွင် ပြောကြားခဲ့သည်။
တိုက်ခိုက်မှုသည် ည ၁၀ နာရီခန့်တွင် ဖြစ်ပွားခဲ့ခြင်းဖြစ်ပြီး၊ နယူးယောက်မြို့တော်၏ နှစ်စဉ်နှစ်သစ်ကူးကြိုဆိုပွဲအတွက် လူထောင်ပေါင်းများစွာ စုဝေးနေသည့် Times Square မှ ရှစ်ဘလောက်အကွာအဝေးတွင် ဖြစ်ပွားခဲ့ခြင်းဖြစ်သည်။
ဒဏ်ရာရသူ ၃ ဦးအနက် ၂ ဦးမှာ ဦးခေါင်းကိုထိခဲ့သဖြင့် ဆေးရုံတင်ကုသထားသည်။ ယင်း ၂ဦးအနက် တစ်ဦးမှာ တပ်ဖွဲ့ဝင် အသစ်ဖြစ်ပြီး သူ၏ ပထမဆုံး ကင်းလှည့်တာဝန်ကျသည့်နေ့တွင် ယခုကဲ့သို့ တိုက်ခိုက်ခံခဲ့ရခြင်းဖြစ်သည်။
အခြားတစ်ဦးမှာမူ NYPD တွင် လုပ်သက် ၈ နှစ်ရှိ ဝါရင့်ရဲအရာရှိဖြစ်ကာ ပြတ်ရှဒဏ်ရာဆိုးဆိုးရွားရွားခံစားခဲ့ရသဖြင့် ဆေးရုံသို့ပင် တင်ပို့ကုသထားသည်။ ဒဏ်ရာရသူ ၃ ဦးစလုံး၏ ကျန်းမာရေးအခြေအနေမှာ ယခုအခါတွင် တည်ငြိမ်လျှက်ရှိပြီး ပြန်လည်ကောင်းမွန်လာမည်ဟု မျှော်လင့်ကြောင်း NYPD ပြောခွင့်ရပုဂ္ဂိုလ်က ဆိုသည်။
တောခုတ်ဓားဖြင့် တိုက်ခိုက်သူမှာ အသက် ၁၉ နှစ်အရွယ်ရှိ Trevor Bickford ဆိုသူလူငယ်တစ်ဦးဖြစ်သည်။
Trevor Bickford ၏ အဒေါ်ဖြစ်သူက ပြည်ပသို့သွားရောက်ပြီး အစွန်းရောက်များနှင့် လက်တွဲကာ တိုက်ခိုက်လိုကြောင်း အွန်လိုင်းတွင် ပို့စ်တစ်ခုရေးသားခဲ့ပြီးနောက် Trevor Bickford အားလည်း FBI က အကြမ်းဖက်စောင့်ကြည့်စာရင်းတွင် ထည့်သွင်းစောင့်ကြည့်ခြင်း ခံနေရသူဖြစ်ကြောင်း သိရသည်။
NYPD နှင့် FBI ပူးပေါင်းအဖွဲ့က တရားခံဖမ်းမိရေး စုံစမ်းထောက်လှမ်းနေဆဲဖြစ်ကြောင်းသိရသည်။
Ref: 3 New York City officers injured in machete attack, suspect shot near New Year’s Eve ball drop
