ဈေးနှုန်းတည်ငြိမ်နေသည့် ပြည်တွင်းစက်သုံးဆီဈေးနှုန်းများ ယနေ့အနည်းငယ် ပြန်လည်ကျဆင်းလာ

ပြီးခဲ့သည့် တစ်ပတ်အတွင်း တစ်လီလာ ၂၁၀၀ ကျပ်ဝန်းကျင်ဖြင့် တည်ငြိမ်နေသည့် ပြည်တွင်း စက်သုံးဆီဈေးနှုန်းများမှာ ယနေ့ ဇန်နဝါရီ (၅) ရက်တွင် တစ်လီတာ ၂၀၀၀ ကျပ်အောက်သို့ ကျဆင်းလာကြောင်းသိရသည်။

စက်သုံးဆီတင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ရေး ကော်မတီ၏ ယနေ့ ဇန်နဝါရီ (၅) ရက်အတွက် ရည်ညွှန်းဈေးနှုန်းများအရ တစ်လီတာလျင် ၁၀၀ ကျပ်ဝန်းကျင် ကျဆင်းလာသည်ကို တွေ့ရသည်။

ယနေ့ ဇန်နဝါရီ (၅) ရက်မှစတင်ကာ တစ်ပတ်အတွင်း ရောင်းချရန် သတ်မှတ်ပေးထားသည့် ရန်ကုန်အထိုင် စက်သုံးဆီလက်လီရည်ညွှန်းဈေးများမှာ 92 Ron တစ် လီတာလျင် ၁၉၇၅ ကျပ်ဖြစ်ပြီး 95 Ron တစ်လီတာ ၂၀၄၅ ကျပ် ဖြစ်ကြောင်း သိရသည်။

ထို့အပြင် လက်ကားရည်ညွှန်းဈေးနှုန်းများ အနေဖြင့် 92 Ron တစ်လီတာလျင် ၁၈၇၇ ကျပ် ဖြစ်ပြီး 95 တစ်လီတာကို ၁၉၄၇ ကျပ်ဖြင့် ရောင်းချရန် ရည်ညွှန်း သတ်မှတ်ပေးထားခြင်း ဖြစ်သည်။

ယမန်နေ့က ဈေးကွက်အတွင်း ရောင်းချခဲ့သည့် စက်သုံးဆီ ဈေးနှုန်းများမှာ 92 တစ်လီတာလျင် ၂၀၆၀ ကျပ် ဖြစ်ပြီး  95 တစ်လီတာလျင် ၂၁၂၀ကျပ်ဖြစ်‌ကြောင်းသိရသည်။

” ကျတယ်ဆိုတာကလည်း ၁၀၀ နီးနီးလောက်ပဲ ကျတာဆိုတော့ သိပ်တော့ မသိသာဘူးပေါ့။ ဒါပေမဲ့ အများသမားတွေအတွက်ကတော့ သိသာတာပေါ့ ။ ၁၀၀ ဆိုလည်း မနည်းဘူး” ဟု ရန်ကုန်မြို့မှ အဝေးပြေးယာဉ်လုပ်ငန်း လုပ်ကိုင်သူတစ်ဦးက ပြောသည်။

အလားတူ မန္တလေးတိုင်းအတွင်း ယနေ့မှ စတင်ကာ တစ်ပတ်အတွင်းရောင်းချရမည့် စက်သုံးဆီအခြေခံရည်ညွှန်း ဈေးနှုန်းများမှာ 92 တစ်လီတာလျင် လက်လီအနေ ဖြင့် ၂၀၂၀ ကျပ်နှင့် လက်ကားဈေးနှုန်းမှာ တစ်လီတာလျင် ၁၉၄၈ ကျပ် ဖြစ်ပြီး 95 တစ်လီတာလျင် လက်လီဈေးနှုန်း ၂၀၉၅ ကျပ်နှင့် လက်ကားဈေးနှုန်းမှာ ၂၀၂၀ ကျပ် ဖြစ်ကြောင်း သိရသည်။

ထို့အပြင် ဒီဇယ်နှင့် ပရီမီယံဒီဇယ် တစ်လီတာလျင် ၂၃၀၅ ကျပ်ဖြင့် ရောင်းချရန် သတ်မှတ်ပေးထားပြီး မန္တလေးတိုင်းတွင် တစ်လီတာ ၂၃၅၅ ကျပ်ဖြင့် ရောင်းချရန် စက်သုံးဆီ တင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ရေး ကော်မတီက ရည်ညွှန်း သတ်မှတ်ပေးထားသည်။

ပြည်တွင်း၌ စက်သုံးဆီ ဈေးနှုန်းများကို ဖြစ်သင့်ဖြစ်ထိုက်သည့် ဈေးနှုန်းများဖြစ်ပေါ်စေရန်အတွက် စက်သုံးဆီ တင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ရေး ကော်မတီက လိုအပ်သည့် စစ်ဆေးတွက်ချက်မှုများလုပ်ဆောင်ကာ အခြေခံရည်ညွှန်း ဈေးနှုန်းများကို အပတ်စဉ် ရည်ညွှန်း သတ်မှတ်ပေးလျက်ရှိခြင်း ဖြစ်သည်။

ထို့အပြင် စက်သုံးဆီ ဈေးနှုန်းများကို မရိုးဖြောင့်သော နည်းလမ်းများဖြင့် ဈေးကစားခြင်း ၊ သိုလှောင်ထားရှိခြင်းများ ၊ ဈေးတင်ရောင်းချခြင်းများ မပြုလုပ်ရန်နှင့် ယင်းသို့ ပြုလုပ်ပါက အရေးကြီးကုန်စည် ဥပဒေဖြင့် အရေးယူဆောင်ရွက်မည် ဖြစ်ကြောင်းလည်း ကော်မတီက ကြေညာထားသည်။