ဗြိတိန်နိုင်ငံ မြောက်ပိုင်းပင်လယ်ကမ်းခြေမြို့လေးဖြစ်သည့် Scarborough မြို့လေးသို့ ရောက်ရှိခဲ့သော အာတိတ်ပင်လယ်ဖျံကြီးတစ်ကောင် အေးချမ်းစွာ အိပ်စက်နိုင်စေရန်အတွက် ယင်းမြို့တွင် ကျင်းပပြုလုပ်ရန် စီစဉ်ခဲ့သည့် နှစ်သစ်ကူးအကြို မီးရှုးမီးပန်းပစ်ဖောက်မှုများကို ပစ်ဖောက်ခါနီးအချိန်နီးမှ ဖျက်သိမ်းခဲ့သည်။
အဏ္ဏဝါဒေဆိုင်ရာ နို့တိုက်သတ္တဝါများကို အစဉ်စောင့်ကြည့်လျှက်ရှိသည့် ဗြိတိသျှ ရေငုပ်သမားများ၏ ပင်လယ်သတ္တဝါအသက်ကယ်ဆယ်ရေး ပရဟိတအဖွဲ့(BDMLR)၏ အကြံပေးချက်အရ ထိုသို့ဖျက်သိမ်းခဲ့ခြင်းဖြစ်ကြောင်း နှစ်သစ်ကူးကြိုဆိုပွဲကျင်းပရေးဆိုင်ရာ Scarboroughမြို့ကောင်စီခေါင်းဆောင် စတိဗ်ဆစ်ဒွန်က ပြောသည်။
“ကျွန်တော်တို့ ပွဲကျင်းပတာထက် ပင်လယ်ဖျံကြီးရဲ့ ကောင်းကျိုးကို ဦးစားပေးရမှာပါ”ဟု သူကပြောသည်။
Thor ဟု မြို့ခံများက ချစ်စနိုး နာမည်ပေးခဲ့ကြသည့် အဆိုပါ ပင်လယ်ဖျံကြီးသည် မြောက်ဖက်အရပ်သို့ ဆက်လက်ထွက်ခွာမည်ဖြစ်ပြီး၊ ထိုသို့မထွက်ခွာမီ မိမိတို့မြို့တွင် ခေတ္တမျှ အနားယူနေခြင်းဖြစ်ကြောင်း တောရိုင်းတိရစ္ဆာန်ကျွမ်းကျင်သူများက ဆိုသည်။
မြို့ကောင်စီအနေဖြင့် မီးရှုးမီးပန်းပစ်ဖောက်ခြင်းကို ဖျက်သိမ်းပေးခဲ့သည့်အတွက် အထူးကျေးဇူးတင်ကြောင်း BDMLR ပရဟိတအဖွဲ့မှ မစ္စEmily Mayman ကပြောသည်။
“ပင်လယ်ဖျံကြီးရဲ့ ကောင်းကျိုးချမ်းသာကိုဆောင်ရွက်ပေးတာဟာ အခြားကိစ္စရပ်တွေထက် သာလွန်မွန်မြတ်တယ်လို့ သူတို့က ယူဆတဲ့အတွက် အရမ်းကျေးဇူးတင်မိပြီး၊ ဒါဟာ ကမ္ဘာတစ်ဝန်းမှာ ကြီးကျယ်တဲ့ ဆောင်ရွက်မှုတစ်ခုလဲဖြစ်ပါတယ်”ဟုလည်း သူကဆိုသည်။
ပြီးခဲ့သည့် သီတင်းပတ် စနေနေ့က အဆိုပါမြို့လေးသို့ ရောက်ရှိလာပြီး လူသူအများကို ဆွဲဆောင်မှုရှိခဲ့သော အာတိတ်ပင်လယ်ဖျံကြီးသည် ယခုအခါတွင်မူ မြောက်ပင်လယ်တွင်းသို့ ဆင်းသက်ကာ ခရီးဆက်နေပြီဟု ယုံကြည်ရသည်။
