ကိုဗစ်(၁၉)ရောဂါအခြေအနေကြောင့် ၂ နှစ်ကျော်ကြာပိတ်ထားသည့် မြန်မာ-ထိုင်းနယ်စပ်ရှိ မြဝတီ -မဲဆောက် ချစ်ကြည်ရေးတံတားအမှတ်(၁)အား ဇန်နဝါရီ ၁၂ ရက်တွင် ပြန်လည်ဖွင့်လှစ်သွားမည်ဖြစ်ကြောင်း သိရသည်။
ချစ်ကြည်ရေးတံတားအမှတ်(၁)အား ပြန်လည်ဖွင့်လှစ်ရန် တာ့က်ခရိုင်၌ ထိုင်းနိုင်ငံတာဝန်ရှိသူများက ဇန်နဝါရီ ၆ ရက်တွင် အစည်းအဝေးပြုလုပ်ခဲ့ကြပြီးနောက် ဇန်နဝါရီ ၁၂ ရက်၌ပြန်လည်ဖွင့်လှစ်မည်ဟု မဲဆောက်မြို့၏ မြို့တော်ဝန် မစ္စတာ စုံချိုင် တရိုင်ထစ်ချတ်စကွန်က အသိပေးရေးသားထုတ်ပြန်ခဲ့ခြင်းဖြစ်သည်။
“တံတားပြန်ဖွင့်ဖို့ကသေချာသွားပြီ မဲဆောက်မြို့တော်ဝန်က တရားဝင်ထုတ်ပြန်လိုက်တယ် ကုန်စည်ကူးသန်းရောင်းဝယ်ဖို့အတွက် ပိုပြီးအဆင်ပြေသွားတာပေါ့ အခုဆိုရင် မြဝတီမြို့က ခရိုင်လူဝင်မှုကြီးကြပ်ရေးရုံးမှာ ဇန်နဝါရီ ၉ ရက်ကစပြီး နိုင်ငံကူးနယ်ခြားဖြတ်ကျော်ခွင့်စာအုပ်(Boder Pass)တွေလုပ်ပေးနေပြီ”ဟု မြဝတီမြို့ခံတစ်ဦးဖြစ်သည့် ကိုညီညီကပြောသည်။
အဆိုပါ နိုင်ငံကူးနယ်ခြားဖြတ်ကျော်ခွင့်စာအုပ် (Boder Pass) သည် မြဝတီမြို့မှမဲဆောက်မြို့သို့သွားရောက်ရာတွင် အသုံးပြုရသည့် စာအုပ်ဖြစ်ကာ တံတားပြန်လည်ဖွင့်လှစ်မည့်သတင်းအရ ပြုလုပ်သူများပြားလျက်ရှိကြောင်း သိရသည်။
မြဝတီ-မဲဆောက်ချစ်ကြည်ရေးတံတားအမှတ်(၁) အား ပြန်လည်ဖွင့်လှစ်ရန် မြန်မာနိုင်ငံမှတာဝန်ရှိသူများနှင့်ထိုင်းနိုင်ငံမှတာဝန်ရှိသူများ အကြိမ်ကြိမ်တွေ့ဆုံညှိနှိုင်းခဲ့ကြကြောင်း သိရသည်။
ထို့ပြင် ပြန်လည်ဖွင့်လှစ်နိုင်ရန် မြန်မာနိုင်ငံဘက်ခြမ်းရှိ တံတားပေါ်နှင့်ဌာနဆိုင်ရာအဆောက်အဦးများထိုင်းနိုင်ငံဘက်ခြမ်းရှိ တံတားနှင့်ဌာနဆိုင်ရာအဆောက်အဦးများအား သန့်ရှင်းရေးပြုလုပ်ခြင်းများကို ဆောင်ရွက်ခဲ့ကြပြီးဖြစ်ကြောင်း သိရသည်။
“တံတားပြန်ဖွင့်မယ့်သတင်းက ခနခနကြားနေရတယ် ပြီးခဲ့တဲ့ ၈ ရက်နေ့ကဖွင့်မယ်လို့သတင်းကြားတယ် မဖွင့်ဖြစ်ဘူး ၁၂ ရက်နေ့ကတော့တကယ်ဖွင့်ဖြစ်ပြီ ထိုင်းနိုင်ငံဘက်မှာတော့ အခမ်းအနားနဲ့ဖွင့်မယ်လိုလည်းကြားတယ် မြန်မာနိုင်ငံဖက်ကတော့ အခမ်းအနားနဲ့ဖွင့်ဖို့ရှိ/မရှိမသိဘူး” ဟု မြဝတီမြို့ခံတစ်ဦးဖြစ်သည့် ကိုညီညီကပြောသည်။
Photo-ဘီဝမ်း
