ရခိုင်ပြည်နယ်အတွင်း အရေးပါသည့် လမ်းမကြီးများနှင့် မြစ်ကြောင်းများတလျှောက် ကုန်စည်ပို့ဆောင်ရေးနှင့်အရပ်ဘက် အသွားအလာများ ပြန်လည်ဆောင်ရွက်နိုင်ပြီဖြစ်ကြောင်း ယမန်နေ့ ဇန်နဝါရီ ၁၁ ရက် ရက်စွဲဖြင့် ကုလသမဂ္ဂလူသားချင်းဆိုင်ရာပေါင်းစပ်ညှိနှိုင်းရေးရုံး(OCHA Myanmar) က ထုတ်ပြန်ချက်အရ သိရသည်။
ရခိုင်ပြည်နယ်အတွင်း သွားလာကူညီခွင့်များကို လအတန်ကြာပိတ်ထားရာမှ ပြန်လည်ခွင့်ပြုပေးလာခြင်းကြောင့် ထိခိုက်ခံစားရသူများ၊ ရွှေ့ပြောင်းနေထိုင်ကြရသူများအတွက် စားနပ်ရိက္ခာ၊ အာဟာရ၊ ကျန်းမာရေး၊ ပညာရေး၊ ကာကွယ်စောင့်ရှောက်ရေး၊ ရေနှင့်ပတ်ဝန်းကျင်သန့်ရှင်းရေးအပါအဝင် အခြား လူသားချင်းစာနာမှုဆိုင်ရာအကူအညီတွေကို တဖြည်းဖြည်း ပြန်လည်စတင်နေပြီ ဖြစ်သည်ဟု OCHA myanmar၏ ထုတ်ပြန်ချက်တွင် ဖော်ပြထားသည်။
သို့သော် လက်ရှိတွင် ရခိုင်ပြည်နယ်အတွင်း ကန့်သတ်နယ်မြေ (၈) မြို့နယ်၏ မြို့ပေါ်ဧရိယာများကိုသာ သွားလာခွင့်ရရှိကြောင်း ဆိုသည်။
” ရခိုင်နဲ့ ချင်းပြည်နယ်တောင်ပိုင်း ပလက်ဝမြို့နယ်တို့မှာ ရွှေ့ပြောင်းနေထိုင်သူဦးရေ ၁၆,၀၀၀ ကျော်ရှိပြီး ယခင်နဲ့ လက်ရှိ ပဋိပက္ခတွေကြောင့် ပြည်တွင်းရွှေ့ပြောင်းနေထိုင်ကြရသူပေါင်း ၈၉,၀၀၀ ကျော်အထိ ရှိလာပြီ ဖြစ်ပါတယ်။’ ဟု ထုတ်ပြန်ချက်တွင် ဆိုထားသည်။
လက်ရှိတွင် ရခိုင်နှင့် ချင်းပြည်နယ်တောင်ပိုင်း၌ ရခိုင့်တပ်တော် AA နှင့် တပ်မတော်တို့အကြား အလွတ်သဘောအပစ်ခတ်ရပ်စဲရေး သဘောတူညီချက် ဆက်လက်တည်တံ့နေသော်လည်း လက်ရှိအခြေအနေသည် ထိလွယ်ရှလွယ်ဖြစ်နေဆဲဟုဆိုသည်။
ထို့အပြင် မြန်မာနိုင်ငံ အနောက်မြောက်ပိုင်းနှင့် အရှေ့တောင်ပိုင်းတို့တွင် ပြင်းထန်သည့်တိုက်ပွဲများ၊ လုံခြုံရေးတင်းကျပ်မှုများ ဝင်ရောက်ကူညီခွင့်ကန့်သတ်ချက်များ၊ လူသားချင်းစာနာမှုဆိုင်ရာလုပ်သားများအပေါ်ခြိမ်းခြောက်မှုများကြောင့် အရပ်သားပြည်သူများ၏ ဘေးကင်းလုံခြုံမှုကို ခြိမ်းခြောက်နေသကဲ့သို့ ရွှေ့ပြောင်းနေထိုင်မှုများထပ်မံဖြစ်ပေါ်စေပြီး လူသားချင်းစာနာမှုအကူအညီပေးရေးလုပ်ငန်းများကိုလည်း အဟန့်အတားဖြစ်စေကြောင်း ထုတ်ပြန်ချက်တွင် ပါရှိသည်။
၂၀၂၂ ခုနှစ်ကုန်အထိ မြန်မာနိုင်ငံတဝှမ်း၌ လူဦးရေ ၁ ဒသမ ၅ သန်းကျော်မှာ နေရပ်စွန့်ခွာနေကြရဆဲဖြစ်ပြီး၊ ခက်ခဲသည့် အခြေအနေများဖြင့် နေထိုင်နေကြရသည့်အတွက် လူမှုကယ်ဆယ်ရေးအကူအညီများ အပူတပြင်းလိုအပ်နေကြောင်း OCHA Myanmar ၏ ထုတ်ပြန်ချက်တွင်ဖော်ပြသထားသည်။
ပုံစာ-မစ္စတာ ဆာဆာကာဝါ မြန်မာနိုင်ငံ ခရီးစဉ်တွင် ရခိုင်ပြည်နယ်အတွင်းရှိ စစ်ဘေးရှောင်စခန်းများသို သွားရောက်လေ့လာခဲ့စဉ်။
