တရုတ်မှ ကိုဗစ်ကန့်သတ်ချက်များ ဖြေလျှော့ပေးလိုက်သည့်အပြင် နှစ်ကူးကာလ ဝယ်လိုအားကောင်းလာသည့် အတွက် ဖရဲနှင့် သခွားမွှေး ဈေးကွက်ကောင်းလာကာ တောင်သူများ အကျိုးအမြတ်များလာကြောင်း မူဆယ် ၁၀၅ မိုင်ရှိ ဖရဲနှင့်သခွား ကုန်သည်များထံမှ သိရသည်။
ပြီးခဲ့သည့် နှစ်ကုန်ပိုင်းအထိ ဈေးကွက်ကျနေရာမှ ယခုနှစ်ဆန်းပိုင်းတွင် တဖြေးဖြေးဈေးကွက် ကောင်းမွန်လာကာ ဝယ်လိုအားလည်း မြင့်တက်နေခြင်းဖြစ်ကြောင်း မူဆယ် ၁၀၅ မိုင် သစ်သီးကုန်သည်များထံက သိရသည်။
ယနေ့ ဇန်နဝါရီ (၁၇) ရက် နံနက်ပိုင်း အရောင်းဝယ် ဖြစ်သည့် ဈေးနှုန်းများအရ အရည်အသွေးမြင့် (၈၅၈) ဖရဲ (1Kg) လျှင် တရုတ်ယွမ်ငွေ ၄ ဒဿမ ယွမ်၊ ထဲန့်ဝမ် ဖရဲ (အချို) (1Kg) လျှင် ၄ ဒဿမ ၃၀ ယွမ်၊ အစေ့မဲ ဖရဲ (1K g) လျှင် ၄ ဒဿမ ၂၀ ယွမ်၊ သခွားမွှေး (1Kg) လျှင် ၅ ယွမ် စသဖြင့် ပေါက်ဈေး ရှိကြောင်း သိရသည်။
ယင်းကဲ့သို့ ဖရဲနှင့် သခွားမွှေး ဈေးကွက် ပြန်လည်ကောင်းမွန်လာချိန်တွင် မြန်မာပြည်တွင်းရှိ တောင်သူနှင့် ကုန်သည်များအနေဖြင့် အရည်အသွေး မပြည့်မီသည့် သီးနှံများကိုပါ ထည့်သွင်း ရောင်းချမှုများ ရှိနေပြီး ယင်းလုပ်ရပ်များကြောင့် ပြန်လည် ဦးမော့စပြုနေသည့် ဖရဲသခွားမွှေး ဈေးကွက်ကို ထိခိုက်မှုများ ရှိနိုင်ကြောင်း မူဆယ် ၁၀၅ မိုင်မှ သစ်သီးကုန်သည် ကိုသူရမျိုးက ပြောသည်။
” တောင်သူတွေကလည်း အရည်အသွေးမပြည့်မီတဲ့ အသီး တွေလည်း တင်တယ်ဗျာ။ နောက်တစ်ခုက ခူးဖို့ အရက် (၂၀) လောက် လိုနေသေးတဲ့ဟာတွေပေါ့ ၊ ဒီလိုအသီးမျိုးတွေ တင်တော့ ဟိုဖက်မှာ ဈေးကွက် ပျက်တာပေါ့။ အမှန်တကယ် အရည်အသွေးပြည့်မီတဲ့ အသီးတွေဆို ၅ ကျပ်(ယွမ်) လောက်ရမယ့်ဟာက အဲဒီလို အသီးတွေက ၂ ကျပ် (၃) ကျပ်လောက်ပဲ ရတော့တယ်ဗျ” ဟု ၎င်းက ပြောသည်။
ယခင်က တရုတ်နိုင်ငံ၏ ကန့်သတ်ချက်များကြောင့် ယာဉ်ငှားရမ်းခအပါအဝင် အထွေထွေ ကုန်ကျစရိတ်များကြီးမြင့်ခဲ့သည့်အတွက် တောင်သူများ အရှုံးပေါ်ခဲ့ရပြီး လက်ရှိ ရာသီတွင် ယာဉ်းငှားရမ်းခများ သက်သာလာသည့်အ ပြင် ပြီးခဲ့သည့် ရာသီထက် ဈေးကောင်း ရသည့်အတွက် အဆင်ပြေကြောင်းလည်း ကိုသူရမျိုးက ရှင်းပြသည်။
” အများကြီး ကွာခြားတာပေါ့။ ပြီးခဲ့တဲ့နှစ်ကဆို ဖရဲကားတွေပေါ့နော် ၊ တရုတ်ကားတွေငှားရင် တစ်စီးကို မြန်မာငွေ သိန်း ၂၀၀ ပတ်ချာလည်လောက် ပေးရတယ်။ အခုကဆိုရင် ဘာမှ ပေးစရာမလိုဘူးဗျာ ။ ကားလည်း ငှားစရာမလိုဘူး ၊ ကိုယ့်ကားနဲ့ ကိုယ် ဝင်လို့ရနေတော့ အားလုံးအဆင်ပြေပါတယ်ဗျ။ မနှစ်ကထက်စာရင် အခုကအရမ်း ကောင်းပါတယ်။ တောင်သူတွေအတွက် အကျိုးအမြတ်များမယ့်နှစ်လို့ ပြောလို့ရတာပေါ့” ဟု ၎င်းက ဆိုသည်။
ပြီးခဲ့သည့် နှစ်ကုန်ပိုင်းတွင် ဖရဲနှင့် သခွားမွှေး ဈေးကွက်၌ တရုတ်နိုင်ငံ၏ ကန့်သတ်ချက်များအရ တရုတ်ဖက်အခြမ်းသို့ ဝင်ရောက်နိုင်မှုမှာ တစ်ရက်လျှင် ကုန်တင်ယာဉ်အစီး (၂၀/၃၀) ဝန်းကျင်သာ ဝင်ရောက်နိုင်ပြီး ဈေးနှုန်းအနေဖြင့်လည်း (1Kg) လျှင် တရုတ်ငွေ (၂)ယွမ် ဝန်းကျင်သာ ရကြောင်း သိရသည်။
လက်ရှိတွင် တရုတ်ပြည်အတွင်း ဝင်ရောက်နေသည့် ဟိုင်နန်ကျွန်းရှိ ဖရဲထွက်ရှိမှုကုန်ဆုံးချိန် ရောက်နေပြီဖြစ်သည့် အတွက် လာမည့် တရုတ်နှစ်ကူးပြီးချိန်တွင် မြန်မာ့ ဖရဲနှင့်သခွားဈေးကွက်တွင် တရုတ်၏ ဝယ်လိုအား ပိုမိုကောင်းမွန်လာနိုင်ပြီး ဈေးနှုန်းလည်း ပိုမိုကောင်းမွန်လာနိုင်ကြောင်း သုံးသပ်မှုများလည်း ရှိသည်။
လက်ရှိတွင် မူဆယ် ၁၀၅ မိုင်မှ တရုတ်နိုင်ငံဖက်အခြမ်းသို့ နေ့စဉ် တရက်လျှင် ဖရဲနှင့် သခွားမွှေးကား အစီးရေ (၆၀) မှ (၇၀) အထိ ဝင်ရောက်နေပြီး ယမန်နှစ် နှစ်ကုန်ပိုင်း ဝင်ရောက်မှုထက် ထက်ဝက်နီးပါး ပိုမိုတိုးမြင့် ရောင်းချနေရကြောင်း သိရသည်။
